Ồng Lê Trọng Yên, Phó Củ tịc duh broă sùm Anih duh broă Làng bol càr Dăk Nông pà gĭt, càr geh khà bauxite uă mờ uă mpồl lơh sa kă bro neh tong sră bơcri jòi, lơh gơs phan bauxite mờ kờp jơh priă cih tàm sră pơ àr dờng ngan. Nàng lơh gơlik geh bơta tam gơl pràn, càr Dăk Nông dan mpồl lơh broă đơs mờ kâp geh gơnăp gơnoar lơh pràn hòi jà bơcri priă lơh gơl gùng rơndeh ồs tàm tơrbŏ kơnhoàl ù tiah Tây Nguyên.

Tàm hơ̆, Dăk Nông dan ai lài lơh gơl gùng rơndeh ồs Dăk Nông- Chơn Thành (càr Bình Phước) nàng tàm tơrbŏ mờ gùng rơndeh ồs lòt gan câu Á mù tus anih ơhò ơm Thị Vải, drơng jun pơndiang alumin, trà lơh goh. Mờ càr kung dan kơlôi sơnơng bơtơl gơl gùng rơndeh ồs Dăk Nông- Lâm Đồng- Bình Thuận tàm rơndăp ù tiah gùng rơndeh ồs dà lơgar. Ală gùng rơndeh ồs do kung dong jun pơndiang phan lơh geh bơh sươn sre mờ ală phan bơna ndai, pơgồp bơnah chồl tơngguh bơtàu tơnguh lơh sa- mpồl bơtiàn ƀòn lơgar dê mờ ală càr tàm kơnhoàl ù tiah do.