Kàl prang tàm tiah nhàr lơgar kơnhoàl Cư Jŭt càr Dăk Nông trồ tơngai duh tơr ồl ngan. Tàm tiểu khu 833, bơnah brê Dăk Wil, sàh Dăk Wil, ală rŭ rơm neh ro jơh, nhơ̆t ndrờm hoàñ jơh lơm, lơh pơhìn ồs sa gơguh tus khà pal yal tơngĭt kấp 4. Bi Phạm Văn Nhị, lơh broă tàm Anih sền gàr brê sồ 1, Kông ty Lâm nghiệp Dăk Wil pà gĭt, 6 nă cau lơh broă tàm anih do pal sùm crăp rcang lơh broă, lam lơh ală kơnòl broă rcang lài kơryan ồs sa brê:“Bol añ căng tiah den hơ̆ sồng chu tơl tiah, mìng chu tàm tiah geh căng gròi sền ồs lơm. Bè gùng pờ kơryan ồs, oh mi kung koh wàs jơh rŭ rơm, wàs sàng goh, lơh geh apah pơgăp bơh 5 tus 7 thơk, nàng dilah geh ồs sa, khà gơ rề uă rơ̆p ờ gơlik geh. Gơwèt mờ ală gơl gùng làng bol sùm lik mut, bol añ crăp kơƀàng kơryan ồs mờ mblàng yal nàng làng bol in ờ gŏ di khat dồ chu ồs”.

Kông ty Lâm nghiệp Dăk Wil gam atbồ mờr 29 rơbô lồ brê, tàm hơ̆ 100 lồ brê tam, gam wơl là brê geh is, ơm tàm gùl 2 càr Dăk Nông, Dăk Lăk mờ rềp nhàr bal mờ lơgar Campuchia. Ồng Nguyễn Hồng Việt, Phó Kwang Lam bồ Kông ty yal, trồ tơngai tàm tiah nhàr lơgar duh rlau mờ ală tiah ndai bơh 7 tus 10 độ C, lơh pơhìn gơbàn ồs sa brê uă rlau. Den tàng, broă lơh rcang lài kơryan ồs sa brê sùm geh mpồl lơh broă lam lơh jat gờñ rlau: “Tàm kàl prang, kông ty pah ngai lòt sền, sền gŏ geh tiah lơi pơhìn ồs sa den rơ̆p căng tiah, ai oh mi chu bơsong tơn. Geh 11 anih sền gàr brê, tơl anih ndrờm geh 2 nơm sơntèk dơng dà rcang gàr lài mờ pơpgăp 4 rơbô lĭt dồ nơm sơntèk mờ 1 nơm sơntèk dà ngui sa pah ngai pơgăp 5 rơbô lĭt, geh tŭ geh bơta aniai ồs sa rơ̆p ngui rơndeh jun pơndiang dà tus nàng crùh ồs sa. Bơdìh hơ̆, ală anih ndrờm geh rơndăp ƀìñ crùh ồs sa tơl làm”.

Càr Dăk Nông tŭ do gam pơgăp 249 rơbô lồ brê, tàm hơ̆ geh rlau 196 rơbô 300 lồ brê geh is, tơrgùm uă ngan tàm ală kơnhoàl Dăk Glong, Dăk Mil, Dăk Song, Cư Jŭt mờ Tuy Đức. Jat ồng Trần Văn Linh, Phó Lam bồ Ci kụk Sền gàr brê càr Dăk Nông yal, nam 2024, jơh gùt càr gơlik geh 30 dơ̆ ồs sa brê, lơh hoàc huơr pơgăp 32 lồ, gơguh nisơna pơndrờm mờ ală nam lài hơ̆. Nàng tơrmù ƀà uă ngan rlau jơh dơ̆ ồs sa brê, Ci kụk neh ai mờng chài lơh broă, lơh gờñ ală broă lơh nàng kờñ tơnguh uă broă lơh atbồ, sền gàr mờ rcang lài kơryan ồs sa mờ crùh ồs sa brê.

Ồng Trần Văn Linh pà gĭt: “Ci kụk Sền gàr brê càr neh tă pơgồp jơnau đơs mờ Sờh Broă lơh sa suơn sre mờ Bơtàu tơnguh Ƀòn lơgar, Anih duh broă Làng bol càr Dăk Nông sồr ală Mpồl atbồ bê is ồn kwơ màng, brê rcang lài bồ tô dà, Anih duh broă Làng bol ală kơnhoàl, ƀòn dờng sơlơ tơnguh tai broă lơh lòt sền, sŏk sền ală tiah tờm geh pơhìn gơlik geh ồs sa brê nàng gròi sền, jat sền rcang lài kơryan ồs sa. Bơdìh hơ̆, Ci kụk neh sồr ală Mpồl lơh broă sền gàr brê, ală cau tờm brê sơlơ tơnguh tai lòt sền, jat sền broă lơh rcang lài kơryan ồs sa brê tàm kàl prang; pơgồp bal mờ ală Mpồl atbồ brê, kung bè ală kông ty brê bơnơm lơh jat broă lơh ơm gak, sền sơwì, lòt sền, sền gàr brê mờ rcang lài kơryan ồs sa mờ crùh ồs sa brê tàm tơngai kàl prang uă nam 2025".