Tŭ tam gơl jơnau kờñ gơboh nam 2025 bơh 6,84% gơguh tus 8,11%, càr Dăk Nông kung dùl ròt tam gơl ală broă jàu lơh sa kwơmàng. Hơ̆ là kờp jơh rề kes priă Dà lơgar geh 3 rbô 500 tơmàn đong (broă jàu lài do là 3 rbô 350 tơmàn đong); priă lơh geh kờp bal dùl nă cau 85 tơlak đong dùl nă (broă jàu lài do là 82 tơlak đong dùl nă); mờ kờp jơh hòi tơrgùm priă bơcri jơh gùt mpồl bơtiàn geh 26 rbô tơmàn đong (broă jàu lài do là 25 rbô tơmàn đong). Ồng Hồ Văn Mười, Củ tịc Anih duh broă Làng bol càr Dăk Nông pin dờn ngan mờ jơnau kờñ gơguh rlau 8,11% tài bơta pràn bơtàu tơngguh bơh càr dê gam uă mờ ală bơnah priă dờng mờr gơ rê tus ală rơndăp broă lơh tờm kwơmàng tàm ù tiah càr dê. Ồng đơs wih đơs wơl 3 bơta pal sền ngăc, digơlan dong gơguh lơh sa càr Dăk Nông dê geh tŭ digơlan lơh geh 2 nơm khà tàm ală nam tus. Bơh sơnrờp là gùng rơndeh lòt mhar Gia Nghĩa- Chơn Thành rơ̆p sơnđờm lơh tàm nam 2025 do, dong tàm tơrbŏ Dăk Nông mờ tiah đah jum măt tơngai Lik, lơh gơlik bơta gơn kơnờm dờng ngan nàng bơtàu tơngguh. Pơn jăt hơ̆, bơta pràn ù tiah, lòt nhơl càr dê uă ngan, is ồn là Sươn bal ù tiah gùt plai ù UNESCO Dăk Nông gam gơhòi gơ jà năc lòt nhơl kung bè ală cau bơcri priă.

Broă tờm lơh sa khà dùl càr dê là jòi, lơh gơs phan bauxite- alumin-trà gam geh uă cau bơcri priă sền gròi mờ dan bơcri bal mờ khà priă gĭt nđờ tơmàn dolar. Ồng Hồ Văn Mười pin dờn, mờ bơta sồr lơh bơh Cíñ phủ dê, bơta tus bal bơh ală ƀộ, gah dê, ală kal ke, gơkòl tàm broă lam lơh ală rơndăp broă lơh bauxite kờp priă tus gĭt nđờ tơmàn dolar Mỹ geh tă bơsong, bơnah priă uă rơ̆p dong càr gơguh mhar tàm tơngai tus.

“Rơndăp ù tiah 86 Cíñ phủ dê ai gơnoar ai Dăk Nông in 5 jơnum mpồl, lơh gơs phan bơh phan kwơ tàm ù. Ờ kờp jơnum mpồl TKV dê (Tập đoàn Chah- Phan kwơ tàm ù Việt Nam) tŭ do gam lơh den Dăk Nông gam 4 jơnum mpồl. Tŭ do geh bơh 6 tus 7 tập đoàn lơh sa dờng ngan tàm lơgar neh tong sră tơrgùm lơh 4 hìu măy, jơnum mpồl, kờp jơh priă dan lơh rlau 6 tơmàn dolar Mỹ. Lơh bè lơi tàm qúy II êt ngan là pà geh ai 3 jơnum mpồl in bal mờ 3 tơmàn dolar Mỹ den neh 75 rbô tơmàn đong rao, lơh gơguh tai kờp jơh priă bơcri mpồl bơtiàn dê. Den khà gơguh 8% halà 10% ƀươn soh ngan gơ wèt mờ Dăk Nông”.

Ồng Ngô Thanh Danh, Ƀí thư Tỉñ ủy càr Dăk Nông đơs là jơnau kờñ dờng rlau ndrờm bal mờ broă lơh broă pal kràñ cê jơh nùs rlau, pal geh ală broă dong kờl loh làng, di tŭ mờ pràn kơldang nàng chồl tơngguh gơguh lơh sa. Ală kâp, ală gah pal lơh pràn ală broă dong kờl gơhòi gơ jà bơcri priă, lơh niam wơl tiah kă bro, mơkung tơngguh uă cồng nha lơh broă mờ cồng nha ngui bơta pràn. Bal mờ tă bơsong ală kal ke, gơkòl nàng lam lơh ală rơndăp broă lơh dờng bè jòi, lơh gơs phan bauxite-alumin-trà den kờñ pal sền gròi ai priă bơcri dà lơgar, lam lơh ală rơndăp broă lơh, broă bơ̆t bơtàu tờm kwơmàng nàng lơh bơta gơn kơnờm ai lơh sa in bơtàu tơngguh. Ồng Ngô Thanh Danh, đơs loh: “Bơta lơi ƀươn den lơh tĕ, anih lơi gơkòl den lời wơl, anih lơi ờ gơ kòl den kư̆ bè hơ̆ jăt jơnau cih bơh Adăt dê mờ lơh, mờ ờ gŏ di là pal ơm kơ̆p jơh gùt càr den hơ̆ sồng lơh, tŭ hơ̆ là neh lơyài ngan gơbloh. Anih duh broă Làng bol càr sồr lơh kràñ cê jơh nùs ngan ală broă gam gơkòl bơh jŏ tus tŭ do, ai gĭt loh tơn là sờh, gah lơi, ƀòn lơgar lơi mờ cau lơi loh làng ngan, lơh loh kơnòl. Dilah tơrgùm tàm ală broă bơ̆t bơtàu tờm kwơmàng, ală hìu măy bauxite mŭt lơh broă den ngan ngồn lơh geh cồng nha nam 2025”.

Lơh broă tàm càr Dăk Nông, Kwang bàng Ƀộ Cíñ trị, Phó Thủ tướng duh broă sùm Cíñ phủ ồng Nguyễn Hoà Bình đơs nền, Dà lơgar sùm lòt bal mờ ală ƀòn lơgar nàng lơh geh jơnau kờñ gơguh neh ai. Mờ Dăk Nông, Cíñ phủ gam rơhời tă bơsong ală kal ke, gơkòl uă bè ală broă gơrềng tus rơndăp ù tiah, bauxite, năng lượng lơh geh wơl. Phó Thủ tướng tơngkah càr geh broă rơndăp lơh gơguh pal gùt dar 4 bơta pràn mờ Pơrjum dờng Đảng ƀộ càr neh đơs, geh: bauxite, năng lượng lơh geh wơl, lòt nhơl mờ broă lơh sa sươn sre. Phó Thủ tướng is ồn tơngkah càr Dăk Nông tŭ lam lơh ală rơndăp broă lơh bauxite, pleh broă rwah tìs cau bơcri priă rơ̆p gơlam tus jơnau gơlời wơl ờ chài ngan gĭt lài.

“Bauxite den gam là “ùr hàng” tàm do, den tàng kờñ ngan rwah cau bơcri priă gơ in di, geh bơta pràn priă jền, geh mờng chài, pràn jak ătbồ đơng lam lơh, geh mpồl cau geh bơta gĭt wă jrô tàm broă lơh bè broă do. Rwah cau bơcri priă bauxite ờ di là lơh aniai jơh broă rơndăp lơh bơtàu tơngguh càr dê”.