Kah wơl ală ngai nhai 3 kah yau, ồng Tô Tấn Tài (mat sùm hòi jà bèp H’Oanh dê) lài do là Ƀí thư Thị ủy Buôn Ma Thuột, kah wơl: ồng geh Tỉñ ủy càr Dăk Lăk jàu kơnòl broă lơh broă rơndăp lơh lam lơh tàm mpồl làng bol, is ồn tàm làng bol tàm dơlam ƀòn drà dờng in ntào dră.

Bèp H’Oanh, pà gĭt, tŭ sò tơm Buôn Ma Thuột, mpồl ling bơh càr dê hưh hơh ngan, ai làng bol den kơ̆p kờñ ngan geh tơngklàs: “Bol añ geh bơta ƀuơn là tàm Buôn Ma Thuột sùm tàm rài tam dră mờ bol sò tơm lơgar Mỹ là bơt bơtàu anih ơm kis di mờ adat boh lam tàm dơlam tiah drà dờng kung gal ngan sơl, ală mpồl làng bol niam ngan, tài Buôn Ma Thuột ngan là tơrgùm làng bol bơh ală càr tiah ring tiah V yau dê den khi geh broă lơh kăc màng rao. Den bol añ đơs ai làng bol in loh là dơ̆ do pal jơh nùs tơngklàs, gam dùl nă làng bol tàm dơlam ƀòn drà dờng den mpồl cíñ trị gam ơm wơl tàm do”.

Là cau rơndap lơh ală anih lơh broă ndơ̆p tàm ƀòn drà dờng Buôn Ma Thuột tŭ hơ̆, mò Nguyễn Thị Minh Trinh, lài do là Phó mpồl lơh broă cíñ trị, pà gĭt, mpồl geh cau tàm ală mpồl ling- làng bol- cíñ trị, mờ tơl ală bơta làng bol ơm kis rơ̆p geh ală broă hòi jà di pal. Jê nùs ngan pơyoa kòn dềt pa mìng 2 nam tàm tiah tam lơh, mò tus tơn mut tàm dơlam ƀòn drà dờng, tàm yal tơngĭt, lơh ală bơta drơng broă kăc màng, crăp rcang lơh gơ sơ̆t ală cau sò tơm iơh bơsak. Mò Nguyễn Thị Minh Trinh, yal:“Ală tiah đah tàm dơlam khi jơh nùs lơh ngan uă ngan, gơwèt mờ kăc màng khi geh tŭ là khi tus bal mờ añ tơn. Den tàng kơnờm bơh hơ̆ añ gĭt geh ală bơta bơh bol sò tơm dê, mờ tàm jàu broă tơl mpồl tàm ƀòn lơgar pơgồp bal mờ mpồl; dùl là hòi jà mpồl ling rê wơl mờ he, dơ̆ 2 là gơ sơ̆t bòl iơh bơsak koh tăc jơh lòs, dơ̆ 3 là lam mpồl làng bol ntào dră. Tàm bơta hơ̆ bol añ rơwah dùl bàr pe nă cau iơh bơsak geh tiơng pơn rơ ngan mờ gơ sơ̆t, den bơh hơ̆ koh tăc jơh lòs, mờ lơh geh ai mpồl làng bol in ntào ndră”.

Ngoh rơngăc kah wơl ală ngai nhai ờ bĭc nàng mai bồng bi drơng broă ling tơngklàs in, mò Nguyễn Thị Ngọc Lan, gơ hòr dà mat, yal: uă ngan cau neh chơ̆t phi să, neh sồt să nàng gàr geh tơl pèt biài, tơl nơm bồng bi Dà lơgar dê. Tus tŭ do bồng bi gơ par tàm ngai Buôn Ma Thuột tơngklàs, ngoh rơngăc, chờ hờp chờ hờñ ờ gơtùi đơs ngan: “Ngai 10/3 den añ gam kah là oh mi ngar nđờ mang sùm, mai jơh ngai mang, chu đèng zờu mai tus àng tơn. Ờ cau lơi kơlôi là tơngklàs pha lin dờng nam pa ngan bè hơ̆. Tus tŭ do đơs wơl kung rơm nùs ờ kơlôi tus ờ, là gŏ ngan là ală bồng bi he dê geh yồng tơngklàs Buôn Ma Thuột”.

Đơs bè tam lơh pha lin nam lài do, ồng Lê Chí Quyết, lài do là Phó Ƀí thư Tỉñ ủy càr mờ kung là Phó Củ tịc Duh broă sùm Anih duh broă Ling atbồ ƀòn drà dờng Buôn Ma Thuột, đơs, 2 jơnau tờm kwơ màng lơh geh bơta ƀuơn ai tam lơh pha lin in, dơ̆ 1 là ling klàng mờ làng bol niam ngan, dơ̆ 2 là làng bol ală jơi bơtiàn Yoan- Làng bol kòn cau tàm tiah do tam klăc bal ngan. Bơta hơ̆ neh lơh geh bơta pràn tơl làm ai 3 broă lơh tam lơh là ling klàng, cíñ trị, mblàng yal hòi jà ling rê wơl mờ he. Tam lơh pha lin Buôn Ma Thuột geh gơtha is ồn kwơ màng, lơh roh nùs nhơm bol sò tơm dê, lơh bol khi ntoăt dô lik bơh Gia Lai, Kon Tum. Dơ̆ 2 là hòi jà jơh gùt làng bol ntào dră tơngklàs is. Ồng Lê Chí Quyết, pà gĭt, tus ngai 24/3/1975, càr Dăk Lăk neh geh tơngklàs jơh: “Tam lơh pha lin ƀòn drà dờng Buôn Ma Thuột den là jơh ƀòn lơgar ndrờm ntào dră. Chờ hờp ngan là jơh gùt làng bol lòt guh, ntào dră bal mờ 3 gùng tam lơh: ling klàng, cíñ trị, mblàng yal hòi jà ling rê wơl. Là hòi jà ling gơ jrañ sang lài,  jàu dờp phan tam lơh, bal mờ làng bol lơh nrah jơh pôs đồng, lơh nrah jơh ală tiah tam lơh, là tơngkàs is ai he in”.

50 nam neh lòt gan, tam lơh pha lin Buôn Ma Thuột kung gam bè ờs sơl tàm bồ tơngoh ală cau tus bal tam lơh dê bal mờ jơnau bơsram mờng chài bè nùs nhơm tam klăc bal. Tam klăc bal neh lơh geh bơta pràn tơrgùm bal bơh ală mpồl ling  dê, sơnđờm lơh geh pha lin tam lơh Tây Nguyên, lơh geh bơta tam gơl kah yau kwơ màng, sơlơ tơnguh tai lơh mhar tŭ tơngai bơh dơ̆ Tam lơh dờng mờ ntào dră kàl prang nam pa 1975, tơngklàs jơh tiah đah Jum, tơrgùm dùl Dà lơgar.