Tàm Hìu sơnơm sàh Tu Mơ Rông, kơnhoàl Tu Mơ Rông, càr Kon Tum, cau kòp lơi geh bơta ờ niam bè să jan tus tàm do kung kờñ geh mơi Hà kham. Lŏ Y Hà mblàng, 26 nam lơh broă tàm Hìu sơnơm sàh Đăk Hà, hơ̆ sồng tus lơh broă tàm Hìu sơnơm sàh Tu Mơ Rông, kơnhoàl Tu Mơ Rông neh kwèng mờ tơl nă cau kòp, hơ̆ sồng lŏ là cau kòn cau Sơdàng kis mờ dờng tàm ù tiah do, làng bol bàr sàh ndrờm là kòn cau Sơdàng dê lơm den tàng wă jơnau đơs, bơhiàn ờs mờng tàm boh bơr ƀuơn rơlao.

Jơnau sền kờñ git bơh gơnoar atbồ, làng bol mờ ală cau lơh broă tàm Hìu sơnơm geh git, broă lơh pơgồp bal uă ngan bơh Cau lam bồ Hìu sơnơm Y Hà dê tàm 26 nam lơh broă là neh ai geh ală cau mè kòn cau Sơdàng tus deh kòn tàm hìu sơnơm, sơrbì broă deh is kòn tàm hìu. Gơwèt mờ lŏ Y Hà, nùs nhơm gơboh gơbài uă ngan là geh gŏ broă sền gàr bơta pràn kơl dang bơh làng bol kòn cau Sơdàng dê ngai sơlơ niam rơlao: “Lài do bơta gơlik geh bơh kòp gơtờp gơtìp kal ke ngan, geh uă ngan mơya tus tŭ do broă sền gàr bơta pràn kơl dang să jan neh tus tơl hìu, tus tơl ƀòn. Añ ơm tàm do là ờ gam gơtìp kòp prơm tai, gơmù kòp prơm gơlik mhàm, kòp rang ală kòp gơtờp. tàm broă rơcang kơrian kòp geh gơmù uă ngan là uă mờ loh làng ngan. Kơ̆p kờñ jơh ală làng bol kis tàm do sền gròi tus bơta pràn kơl dang să jan să tờm in”.

Tàm tơngai 26 nam lơh broă, đềt mềr mờ broă lơh sơnơm tàm tiah kal ke Tu Mơ Rông, mờ cau kòp kòn cau Sơdàng dê, lŏ Y Hà neh sơrlèt mờ uă bơta kal ke nàng lòt bơsram mờ gơs cau kơl dìng dong kờl làng bol tàm tiah kơh bơnơm geh tus bal mờ broă sền gàr bơta pràn kơl dang să jan niam rơlao. Lơh broă mờ bơsram ndang, nam 2017 lŏ jơh bơsram đại họk gah sền gàr cau bun deh dùh. Mờ gơnoar broă là cau lam bồ Hìu sơnơm sàh Tu Mơ Rông, bal mờ broă đơng lam lơh broă tàm hìu sơnơm, lŏ Y Hà kung sùm tus 8 thôn tàm sàh nàng git ală bơta gơlik geh bơh kòp gơtờp, tìp mờ mblàng yal nàng làng bol sền gròi bơta pràn kơl dang să jan.

Tàm tơngai lŏ lơh broă bal mờ ƀák sìh, cau lơh broă tàm hìu sơnơm, neh uă dơ̆ dong klàs kis cau ùr geh bun mờ kòn se. Nùs nhơm đềt mềr mờ broă lơh sơnơm tàm tiah kal ke mờ cau kòp kòn cau Sơdàng bơh lŏ Y Hà dê geh cau lơh broă bal đơs niam ngan. Lŏ Phan Thị Thanh Vân, cau lơh broă tàm Hìu sơnơm sàh Đăk Hà pà git: “Bi Y Hà là dùl nă cau ñhăp ñhar ngan tàm broă lơh. Tàm Hìu sơnơm pah ngai bi sồr cau lơh broă tàm hìu sơnơm lơh jăt broă nàng lơh geh ală jơnau kờñ. Tàm ală broă lơh bi tus bal mờ ală oh mi tus tàm thôn nàng mblàng yal bè jơnau sền gàr bơta pràn kơl dang deh dùh, hơ̆ sồng cit vaccine tàm tiah bơdìh hìu sơnơm. Bi sền gròi, dong kờl oh mi tàm hìu sơnơm lơh broă”.

Gam ƀák sìh Nguyễn Thành Thảo, Phó lam bồ Hìu sơnơm kơnhoàl Tu Mơ Rông den đơs: “Lŏ Y Hà ñhăt ñhar ngan tàm broă sền gàr bơta pràn kơl dang să jan làng bol tàm sàh. Mờ nùs nhơm niam, ñhăt ñhar lŏ Y Hà sền gròi uă ngan tus làng bol tàm sàh dê mờ lŏ Y Hà geh nùs nhơm gơguh jăk tàm broă lơh, geh bơsram kờñ bơsram broă lơh. Lŏ Y Hà là dùl nă cau lam lài ngan bơh hìu sơnơm dê”.

Geh 26 nam lơh broă, đềt mềr mờ broă sền gàr bơta pràn kơl dang să jan làng bol, lŏ Y Hà, Lam bồ Hìu sơnơm sàh Tu Mơ Rông, kơnhoàl Tu Mơ Rông, càr Kon Tum là cau kơl dìng kơ̆ kơl jăp làng bol kòn cau Sơdàng kis tàm do in. Broă lơh, nùs nhơm geh kơnòl uă bal mờ nùs nhơm kờñ gơboh mờ broă lơh bơh lŏ dê gam pơn jăt tai pơgồp bal tàm broă tam gơl nùs nhơm git wă, dong kờl làng bol kis tàm ù tiah gam gơtìp uă ngan kal ke do geh tus bal mờ broă sền gàr gah lơh sơnơm niam rơlao. Bơh tŭ hơ̆, he gŏ geh nùs nhơm phi să, nùs nhơm pràn kơl dang mờ jơh nùs bơh ală kwang bàng, cau lơh sơnơm tàm tiah ngài dê. Mờ ai tơngŏ nùs nhơm tam klăc bal, dùl nùs bal bơh jơh mpồl kwang bàng lơh sơnơm bal mờ làng bol kis tàm ƀòn lơgar dê. He kung gŏ nùs nhơm pơnyờ să bơh kòn cau Sơdàng kis tàm sàh do tŭ geh kwang bàng lơh sơnơm jăk chài bè lŏ Y Hà dê, pơgồp bal tàm broă lơh tam gơl jơnau git wă, rề ơnàng bơta niam nàng tus bal mờ broă lơh drơng ala lơh sơnơm ai làng bol in.