Pơrjum đơs nền, tơngai pa do, Đảng mờ Dà lơgar sùm sền gròi bơcri priă uă broă lơh, rơndăp broă lơh tàm tiah làng bol jơi bơtiàn dồ ết nă cau, ngan là broă lơh jơnau kờñ Dà lơgar bè bơt bơtàu ƀòn lơgar pa neh dong lơh muh măt ƀòn lơgar geh bơta tam gơl loh làng, rài kis phan bơna mờ nùs nhơm bơh làng bol dê sùm geh bơtàu tơnguh. Khà hìu bơnhă rƀah uă bơta gơmù mhar, tŭ do gam hơđơm 2%, tàm hơ̆ hìu bơnhă tàm làng bol jơi bơtiàn dồ ết nă cau gam 5,4% gơmù rlau 3% pơndrờm mờ nam 2023.

 Nàng pơn jat tai sơlơ bơtàu tơnguh tai lơh sa mờ rài kis, ala mat ală rơnàng làng bol tàm tiah làng bol jơi bơtiàn dồ ết nă cau tàm ù tiah càr Lâm Đồng neh đơs uă jơnau đơs, jơnau sồr đơs, bè pal ai lài bơsong broă lơh gơwèt mờ oh kòn làng bol jơi bơtiàn dồ ết nă cau tơnơ̆ tŭ jơh bơsram Đại họk, Cao đẳng; lơh broă bơto bơtê broă lơh pal di pal mờ ală bơta geh ngan, dong kờl lơh broă sa bơtàu tơnguh lơh sa hìu bơnhă geh cồng nha nàng rê ơnàng uă.