Lơh chờ Kơphê Buôn Ma Thuột dơ̆ 09 pơn jăt tai đơs nền mờ tơnguh bơngă kơphê Việt Nam dê tàm drà dunia. Tơnơ̆ 50 nam tơngklàs, bă kơphê Dăk Lăk dê neh gơ ơm sùm tàm khà rlau 200 rbô lồ, kơphe lơh geh rlau 540 rbô tấn, geh tus rlau 30% kơphê lơh geh bơh jơh gùt lơgar dê. Kơphê càr Dăk Lăk dê neh tăc tus gĭt nđờ rhiang dà lơgar mờ kơnhoàl ù tiah ală lơgar tàm dunia. Nam 2024, kơphê Dăk Lăk neh tă pơgồp uă ngan tàm kơphê lơh geh 1 tơlak 300 rbô tấn mờ priă geh bơh tăc kơphê mờ lơgar ndai bơh jơh gùt lơgar dê rlau 5 tơmàn dolar Mỹ.

Phó Thủ tướng ồng Trần Hồng Hà đơs nền: Lơh chờ Kơphê Buôn Ma Thuột dơ̆ do là broă lơh geh gơtha ngan, geh lơh di tàm dơ̆ tơngkah kir sơnrai tòm 50 nam tam lơh pha lin Buôn Ma Thuột (10/03/1975- 10/03/2025)- tam lơh pha lin sơnđờm ai Dơ̆ sò tơm mờ ntàu tam lơh lơh geh bơta pha lin dờng kàl prang nam 1975, tơngklàs jơh tiah đah Jum, tơrgùm dùl dà lơgar. Lơh chờ kơphê ờ mìng là broă lơh jờng rơ gar kơphê Việt Nam dê lơm mờ gam là anih cribơyai gơcèng gơnoar broă gùt plai ù dê, tiah ală dà lơgar lơh gơlik mờ tăc bro kơphê tìp măt bal, tam pà bal bơta wèt sền ai dùl rài tơnơ̆ do in kơ̆ kơl jăp jŏ jòng bơh gah kơphê dê.

Nam 2024, dơ̆ sơnrờp tăc kơphê mờ lơgar ndai lơgar Việt Nam sơrlèt rlau 5 tơmàn dolar Mỹ, pơn jăt tai đơs nền bơngă là cau tăc kơphê dờng dơ̆ bàr tàm dunia, mìng tơnơ̆ lơgar Brazil lơm. Tàm hơ̆, Dăk Lăk- “Tiah tờm kơphê Việt Nam dê” tă pơgồp pơgăp 18% priă geh bơh tăc mờ lơgar ndai; măt kă bro phan mờ sơñio lam ù tiah “Kơphê Buôn Ma Thuột” tiơng pơnrơ neh geh măt tàm rlau 100 dà lơgar mờ kơnhoàl ù tiah ală lơgar tàm dunia.

Phó Thủ tướng ồng Trần Hồng Hà sồr: tơngai tus, ală ƀộ, gah, ală ƀòn lơgar, Tơrgùm ală mpồl kơphê- ka kau Việt Nam, ală mpồl lơh sa kă bro lơh gơlik mờ lơh gơs phan, kă bro kơphê tam pà bal bơta wèt sền jŏ jòng, pơgồp bal lơh broă kơ̆ kơl jăp nàng bơ̆t bơtàu tiah tam kơphê niam uă, sang nhơm ƀơ̆ dồ êt. Đòm jăt mờ ngui jak chài măy mŏk pa tàm lơh gơlik lơh gơs phan, tơrmù ƀà gơrềng tus tiah ơm kis. Bơ̆t bơtàu ală anih lơh gơlik phan kơ̆ kơl jăp jăt tàm bơta lơh bal đah cau lơh broă sa, mpồl lơh broă bal, mpồl lơh sa kă bro lơh gơs phan mờ tăc mờ lơgar ndai nàng kơ̆ kơl jăp giă tăc bro mờ tơnguh priă lơh geh ai cau tam kơphê in.

Bal mờ hơ̆, ală mpồl lơh sa kă bro pal rơcăng lài bơcri priă tàm măy mŏk sồ nàng gàr bơta song dơ pă loh làng, lơh ală anih ătbồ kơ̆ kơl jăp bơh broă lơh gơlik tus lơh gơs phan mờ tăc mờ lơgar ndai. Phó Thủ tướng ồng Trần Hồng Hà, đơs sùm, pal sền gròi rlau tai tus yal tơngĭt uă măt kă bro phan kơphê Việt Nam.

"Ală Ƀộ Lơh sa mờ măy mŏk mờ Kă bro phan, Cribơyai broă mờ lơgar nda, gah rơndeh par, lòt nhơl pal sền gròi hòi jà rề ơnàng drà tàm lơgar mờ ală lơgar, yal tơnggĭt phan bơna kơphê Việt Nam tàm ală broă lơh cribơyai broă mờ lơgar ndai, anih lòt nhơl tiơng pơnrơ; mờ ală mpồl lơh sa kă bro kờñ pal geh broă rơndăp lơh yal tơnggĭt uă, marketing, gĭt nền măt kă bro phan dipal mờ pràn jak; rề ơnàng gah tam pà phan tơn tàm ală drà pràn, bơtàu tơngguh kă bro internet, rơ̆ ro gah tăc bro”.

Tàm lơh chờ dơ̆ do, đơng lam Ƀộ Niam chài, Tàp pràn să jan mờ Lòt nhơl neh jàu Jơnau lơh nền dờp “Bơta gĭt wă tam mờ lơh gơs phan kơphê Dăk Lăk”, là Phan lời wơl niam chài ờ di phan bơna dà lơgar dê. Kung tàm broă lơh do sơl, làng bol mờ năc lòt nhơl neh geh sền broă lơh đơs crih tam ya “Buôn Ma Thuột- Anih tus bơh kơphê dunia dê”. Jơh ală ndrờm wăc sềr rùp gùng lòt brồ guh tus cồng nha mờ đơs nền bơngă kơphê Buôn Ma Thuột tàm muh măt ală lơgar. Ồng Trương Thanh Bình ơm tàm kơnhoàl Krông Buk, càr Dăk Lăk đơs: “Lơh chờ ngai sơlơ geh bơcri priă mờ lơh niam rlau, gơcèng broă lơh dờng rlau mờ ală nam lài. Do kung là bơta bơtàu tơngguh nàng gơn kơnờm kơphê Buôn Ma Thuột sơlơ bơtàu tơngguh rlau tai”.

Tàm tơngume lơh chờ kơphê Buôn Ma Thuột dơ̆ 09 nam 2025, geh mờr 500 hìu tăc dà kơphê drơng gời kơphê ờ sa priă tàm làm bă tiah, bơh ală hìu tăc kềng gah gùng, ală hìu tăc ƀươn tus dì ală hìu tăc dờng geh bơcri lơh niam ngan bơh ală măt kă bro phan kơphê tiơng pơnrơ dê. Kơphê neh gơgơs bơta niam chài wă rò năc bơh cau Dăk Lăk dê tŭ kơlôi tus bơ̆t bơtàu ƀòn dờng kơphê dunia dê.

Dơ̆ dùl dơ̆ hùc kơphê ờ sa priă bơh uă măt phan tàm gùng Phan Đình Giót, ƀòn dờng Buôn Ma Thuột dê, ồng Nguyễn Văn Chất chờ hờp đơs, dơ̆ lòt nhơl bồ sơnam pa bơh càr Nghệ An mŭt tàm Dăk Lăk dơ̆ do gơ “niam ngan” bè ly dà kơphê Buôn Ma Thuột.

“Bè do là niam ngan, ờ geh bơta lơi là đơs ờ niam ờ, bơh bi taxin tus cau drơng broă tàm do. Añ mŭt ndo di 3 ngai mờ gơlơh niam nùs ngan. Do là tiah tờm, ƀòn tờm kơphê dê den ngan ngồn là kơphê pal bơkah rao, drim ti lòt pơrjum drà añ blơi mờr 1 tơlak đong priă kơphê nàng rê pà gơ̆p bơyô in”.

Lơh chờ kơphê Buôn Ma Thuột dơ̆ 09 nam 2025 geh đơs là lơh chờ niam ngan rlau jơh bơh lài tus tŭ do tŭ di tàm dơ̆ Dăk Lăk tơngkah kir sơnrai 50 nam tơngklàs Buôn Ma Thuột, lơh tềl dùl gùng lòt bềng bơta pơnrơ dờng mờ uă broă lơh geh bơh càr dê. Tàm tŭ hơ̆, yal giă tăc bro kơphê kung gam “gơguh” sùm jơh dùl nam do, mờ giă jơnhoa ngan rlau jơh bơh lài tus tŭ do (rlau 5.350 dolar tàm dùl tấn, ndrờm mờ 131 tơlak đong dùl tấn tàm ngai 10/03), sơlơ lơh làng bol tàm tiah tờm kơphê sơlơ chờ hờp rlau tai.

Lơh chờ kơphê Buôn Ma Thuột dơ̆ 09 nam 2025 bal mờ 17 broă lơh tờm, mờ dồ ròt ală broă lơh pơn jăt bal li la là tŭ jờng rơ gah phan kơphê mơkung cèng tus ală sền gŏ niam ngan bè bơta ƀô bơkah mờ niam chài kơphê dê, mơkung pờ tơlik ală tŭ niam tàm tơrbŏ, bơtàu tơngguh, đơs nền “Buôn Ma Thuột là anih tus bơh kơphê dunia dê”.