Dù, tàm ală mpồl lơh sa kă bro lam lài tàm broă lơh gơs nền nòn tàm càr Dăk Lăk dê là Kông ty kổ phần Kơphe An Thái dê, mìng lơh nàng tăc mờ lơgar bơdìh kơphe klài, kơphe gar neh coh mờ kơphe dà toh 3 tàm 1. Mpồl lơh sa kă bro do neh bơcri priă blơi phan lơh broă pa, kĭ hơ bal nàng blơi gar kơphe bơh ală mpồl lơh broă bal, lơh mpồl pơgồp bal bơh broă lơh tus mờ broă lơh gơs phan, gơs mpồl geh kwơ kơl jăp tàm broă lơh sa suơn sre. Ồng Nguyễn Xuân Lợi, Lam bồ dờng kông ty pà git: “Sền kwơ tus mờ ală broă lơh gơs nền nòn mờ tàm hơ̆ kung đơs uă gơnoar kwơ màng bơh broă pơgồp bal mpồl, tài geh broă pơgồp bal mpồl nền nòn di pal den ngui geh gơnoar nàng lơh gơs dùl bơta kwơ bơh phan geh lơh bal dê”.

Gơwèt mờ Kông ty TNHH MTV Minudo Farm – Care, ƀòn dờng Buôn Ma Thuột, càr Dăk Lăk dê, bơh tŭ crơng gơs neh rơwah broă bơtàu tơnguh kơphe bơkah uă, lơh gơs nền nòn phan geh lơh nàng drơng tàm broă tăc mờ lơgar bơdìh in. Neh sơrlèt mờ uă kal ke, tus tŭ do, kông ty neh lơh geh ală cồng nha niam tŭ ală khà phan kơphe geh uă cau bơh lơgar Nhờk jòi nàng blơi. Ồng Lê Đình Tư, lam bồ kông ty kơlôi sơnơng bè do: “Hơ̆ là dùl dơ̆ lơh kwơ màng ngan gơwèt mờ lơgar Việt Nam dê tàm 6 nam pa do. Tus tŭ do, bơdìh mờ broă tăc kơphe gar tơlir, bol añ lơh geh ală bơta phan dŭt ndơl. Gơguh uă ngan, gơguh rơlao 2 dơ̆ di lah pơn drờm mờ tăc phan kă bro mờ tăc gar, he geh uă ngan bơta niam nàng he pal lơh ngan uă rơlao tai”.

Pa do, măt kă bro kơphe MISS EDE neh tăc mờ lơgar bơdìh container kơphe bŏ gơs ƀò sơnrờp ngan tus lơgar Mỹ. Nàng lơh geh bơta do, mpồl lơh sa kă bro neh pal lơh gơdờp bal mờ ală jơnau kờñ bơh drà kă bro kel ke do dê. Ồng Hoàng Danh Hữu, lam bồ đơng lam Kông ty TNHH Kă bro phan drơng ala lơh sa suơn dờng EDE đơs là, ală mpồl lơh sa kă bro tàm càr Dăk Lăk geh uă ngan bơta kwơ tŭ geh lài tiah lơh geh phan, broă kờñ lơh là gàr niam bơta bơkah phan geh lơh tàm bơta kơl jăp mờ lơh geh khà măt kă bro. Bơta do gam pơgồp bal dong kờl mpồl lơh sa kă bro bơsong kal ke bè priă bơcri lơh: “Priă là dùl bơta kwơ màng gơwèt mờ jơh ală mpồl lơh sa kă bro. Mơya hơ̆ ờ di là bơta kwơ màng ngan. Tài, tŭ he geh dùl bơta pràn tàm pơrlòng lơi hơ̆ bè tiah tam ha là bè sền gŏ khà măt kă bro den he gơtùi ngui nàng hòi jà tă priă. Tŭ bơta bơkah neh niam, tiah tam kơl jăp neh geh dờp mờ bơta kwơ măt kă bo neh hòi jà geh cau hùc kờñ gơboh. Den cau năc rơcang tă lài jơh priă kờñ blơi phan, ala mờ broă pal ai tàm bơta rềs àr pal blơi phan lài mờ kơ̆p cau năc tơm priă tơnơ̆. Tŭ he geh ală bơta kwơ hơ̆ den ờ gơrềng tàm priă uă”.

Nàng lơh pràn broă lơh gơs nền nòn, càr Dăk Lăk neh geh uă broă dong kờl nàng hòi jà mpồl lơh sa kă bro bơcri priă tàm gah broă do. Bơh nam 2016 tus tŭ do, càr neh dờp ring bal gùng dà bơcri priă ai 20 rơndăp broă lơh kơphe, mờ kờp jơh priă bơcri rơlao 4 rơbô tơmàn đong, tàm hơ̆ geh bal mpồl lơh sa kă bro tàm lơgar mờ lơgar bơdìh. Mìng is nam 2024, Anih duh broă làng bol càr Dăk Lăk neh kĭ Khà măt rơndăp broă lơh tờm hòi jà bơcri priă bơh càr dê tus nam 2025, tàm hơ̆ geh 36 rơndăp broă lơh gơwèt ală gah broă lơh sa suơn sre mờ lơh gơs ală phan geh bơh broă lơh sa suơn sre geh 8 rơndăp broă, kờp jơh priă bơcri mờr 1 rơbô tơmàn đong. Ồng Nguyễn Thiên Văn, Phó Củ tịc Anih duh broă Làng bol càr Dăk Lăk pà git: “Bol añpơn jăt tai lơh niam broă lơh gơs nền nòn, lơh ngan bơh 15 tus 20% phan kơphe geh lơh nền nòn. Tàm broă lơh, bol añ rơ̆p tơrgùm tàm ală mpồl, tiah lơh sa mờ măi mok, nàng hòi jà ală mpồl lơh sa kă bro hòi jà tus lơh broă tàm ală mpồl, tiah lơh sa mờ măi mok càr dê. Bơh tŭ hơ̆ lơh gơs nền nòn gơwèt mờ ală phan geh lơh bơh broă lơh sa suơn sre càr dê mờ tăc mờ lơgar bơdìh lơh gơguh bơta kwơ ai làng bol lơh broă sa suơn sre in kung bè ală mpồl lơh sa kă bro, di pal mờ jơnau kờñ bơtàu tơnguh lơh sa mpồl bơtiàn tàm càr dê”.

Là càr geh bă ù bal mờ phan kơphe uă ngan lơgar Việt Nam dê, mờ 212 rơbô lồ ù, khà geh rơlao 520 tấn tàm 1 nam, mơya khà kơphe geh lơh nền nòn nàng drơng tàm broă tăc mờ lơgar bơdìh càr Dăk Lăk dê gam ờ uă. Bơta geh tàm gah phan do gam uă ngan. Broă dong kờl neh geh, ală gùng dà broă lơh kung neh geh pờ, pin dờn là rơ̆p geh tai uă cau bơcri priă tus tàm càr Dăk Lăk nàng tơnguh uă bơta kwơ ai phan geh lơh bơh broă lơh sa suơn sre tờm ngan do in, pơgồp bal tàm broă lơh jăt jơnau kờñ gơguh lơh sa kơl jăp tàm ală nam pơn jăt tai in.