Thôn Gia Xiêng, sàh tiah nhàr lơgar Rờ Kơi, kơnhoàl Sa Thầy, càr Kon Tum geh mờr 300 hìu bal mờ rlau 1 rbô nă làng bol, jơh ală là kòn cau Sơdàng lơm. Bi A Thể, Ƀí thư Ci ƀộ, Lam bồ thôn Gia Xiêng, pà gĭt: tơnơ̆ tŭ bơyai lơh geh cồng nha pơrjum dờng Ci ƀộ tàm nhai 11 nam lài, 14 nă đảng viên Ci ƀộ dê geh pà tơl broă loh làng nàng lơh jăt jơnau kờñ hòi jà ală hìu làng bol lơh tam gơl wơl sươn rơhàng mờ dong kờl 8 hìu rƀah gam wơl bơh thôn dê bơtàu tơngguh lơh sa hìu bơnhă: “Ci ƀộ ai jơnau lơh nền tàm pơrjum hơ̆ sồng pơrjum làng bol lam lơh làng bol kờñ. Bè lơh sa sền gàr ală bơta chi tam, phan ròng. Hòi jà làng bol geh ù klàr tam gơl wơl rơndăp chi tam, lơh tam gơl wơl sươn rơhàng, tơrgùm tam sầu riêng, macca mờ ală bơta chi tam ndai. Hìu kal ke mờ ờ geh cau kơldìng kơnờm den tơrgùm làng bol dong kờl ai hìu hơ̆ in. Kwơmàng là làng bol dồ nùs bal mờ Ci ƀộ”.

Đảng ƀộ sàh tiah nhàr lơgar Rờ Kơi, kơnhoàl Sa Thầy geh 13 ci ƀộ gơ wèt bal mờ 176 nă đảng viên, tàm hơ̆ geh 6 ci ƀộ thôn jơi bơtiàn dồ êt nă cau. Tơnơ̆ tŭ ală ci ƀộ bơyai lơh geh cồng nha pơrjum dờng, tàm 02 ngai là 9 mờ 10 nhai 01 nam 2025, Đảng ƀộ sàh bơyai lơh Pơrjum dờng dơ̆ 18, tơngai lơh broă bơh nam 2025- 2030.

Jơnau lơh nền tàm pơrjum bơh Pơrjum dờng Đảng ƀộ sàh Rờ Kơi dê gĭt nền tơngai lơh broă pa gơguh lơh sa kờp bal pah nam geh rlau 14%; khà hìu rƀah pah nam gơmù bơh 5 tus 6%; tus nam 2030 sàh geh kờp bal priă lơh geh tàm dồ nă cau 68 tơlak đong;…Ồng Mai Nhữ Nam, Phó Ƀí thư Đảng ủy, Củ tịc Anih duh broă Làng bol sàh Rờ Kơi pà gĭt, tơnơ̆ tŭ bơyai lơh pơrjum dờng lơh geh cồng nha tơn, Đảng ủy sàh sơrbăc mhar lam lơh ală broă lơh nàng lơh jăt ngan ngồn ală jơnau kờñ bơtàu tơngguh lơh sa- mpồl bơtiàn: “Mpồl Lơh kơnòl broă sùm Đảng ủy lam lơh mhar ai lơh jăt ală tơnggume jơnau lơh lơh nền tàm pơrjum bơh pơrjum dờng dê, ờ gơtùi lời lơyài ờ. Jàu kơnòl broă ai ală ci ƀộ in tơnơ̆ hơ̆ lam lơh jơh tus kâp hơđơm, is ồn là làng bol nàng làng bol in wă loh mờ gĭt loh geh jơnau lơh nền tàm pơrjum. Lơh jăt jăt jơnau lơh nền tàm pơrjum tam gơl pa sươn rơhàng, tơn jơh hìu ing, hìu sèt ñhăt dà mìu, tam gơl bă ù chi tam bơh tờm chi tam lơyah ngai tus chi tam jŏ ngai”.

Jăt broă rơndăp lơh, Đảng ƀộ kơnhoàl Sa Thầy geh Tỉñ ủy càr Kon Tum rwah nàng bơyai lơh pơrjum dờng lơh tơrlòng lài tơngai lơh jăt tàm bồ qúy II nam 2025. Tài bè hơ̆ tus ngai 27/02 pa do, jơh 11 sàh, ƀòn drà dềt kơnhoàl dê neh lơh sir broă bơyai lơh Pơrjum dờng Đảng ƀộ tơngai lơh broă bơh nam 2025- 2030. Pơrjum dờng neh pồ 160 kwang bàng mŭt tàm kâp ủy, 55 nă kwang bàng mŭt tàm Mpồl Lơh kơnòl broă sùm Đảng ủy, 11 nă Ƀí thư Đảng ủy mờ 22 nă Phó Ƀí thư Đảng ủy.

Mò Y Sâm, Phó Ƀí thư Duh broă sùm Huyện ủy, Củ tịc Mpồl duh broă Làng bol kơnhoàl Sa Thầy pà gĭt, lơh jăt Jơnau đơs pơndŭt sồ 127, ngai 28/02/2025 bơh Ƀộ Cíñ trị, Mpồl Đơng lam Đảng dà lơgar dê, Đảng ƀộ kơnhoàl Sa Thầy ơm ing bơyai lơh pơrjum dờng, mơya ờ gam geh bồ tơnggo sền rơmê, kơ̆p gơn broă rơndăp tăp sèng lam lơh mpồl lơh broă ală anih lơh broă cíñ trị mờ kung gam kràñ cê jơh nùs sơl lam lơh jăt ală jơnau kờñ bơtàu tơngguh: “Bol hi lơh niam ală bơta pràn, bơta ƀươn ƀòn lơgar dê. Ală rơndăp broă lơh geh cồng nha pơn jăt tai lam lơh. Bal mờ hơ̆ hòi jà ală cau bơcri priă nàng bơcri priă bơ̆t bơtàu mờ bơtàu tơngguh kơnhoàl. Gơ wèt mờ broă lơh bơ̆t bơtàu Đảng bol hi tơrgùm bè broă lơh bơ̆t bơtàu mpồl lơh broă đảng sàng goh, pràn kơnhăp, sền gròi tus broă bơto bơtê, tề lam mpồl kwang bàng bơh kâp kơnhoàl tus dì kâp hơđơm nàng lơh geh kơnòl broă pa”.

Lơh jăt Jơnau đơs pơndŭt sồ 127, ngai 28/02/2025 Ƀộ Cíñ trị, Mpồl Đơng lam Đảng Dà lơgar dê, Tỉñ ủy càr Kon tum tŭ do neh sồr ơm ing bơyai lơh pơrjum dờng Đảng ƀộ kâp sàh, kâp kơnhoàl tơngai lơh broă bơh nam 2025- 2030. Bal mờ lơh jăt niam jơnau sồr lơh bơh Dà lơgar dê, gơ wèt mờ Đảng ƀộ ală sàh, ƀòn drà dềt tàm càr Kon Tum neh bơyai lơh pơrjum dờng gam rơcăng, kràñ cê jơh nùs lơh jăt ală jơnau kờñ bơtàu tơngguh lơh sa- mpồl bơtiàn. Nùs nhơm geh kơnòl, bơta lơh bal ndrờm bal bơh kâp ủy, gơnoar ătbồ mờ làng bol dê neh lơh geh bơta gơn kơnờm pràn kơldang nàng lơh jăt ngan ngồn ală jơnau kờñ bơtàu tơngguh, pơgồp bơnah tơnguh uă rài kis làng bol mờ chồl tơngguh bơta bơtàu tơngguh kơ̆ kơl jăp bơh ƀòn lơgar dê.