Hìu bơnhă ồng K’Phân, đảng viên ơm tàm thôn 3, sàh Đinh Trang Thượng, kơnhoàl Di Linh là dùl tàm ală hìu lòt lài lơh kơphê niam uă. Mờ 3 lồ kơphê, kàl pa do dong hìu bơnhă ồng lơh geh 17 tấn kơphê gar, cèng wơl priă lơh geh gĭt nđờ tơmàn đong. Ờ mìng gĭt lơh pas ai să tờm is he in lơm, K’Phân gam jơh nùs dong kờl làng bol ƀòn lơgar tam pa wơl sươn kơphê kra jŏ sơnam, bơto pơlam bơkiar lơh tam gơl wơl sơntìl pa nàng tơngguh uă cồng nha lơh geh mờ plai kơphê lơh geh.

“Kơphê kra jŏ sơnam gơ ai cồng nha ờ huan uă, pal bơkiar nàng lơh tam gơl pa wơl sươn chi. Kơphê bơkiar den pal tơl dà tuh, phơng ơn chi hơ̆ sồng dờng pràn gơtùi niam geh. Tàm hơ̆, tuh dà êt ngan là 3 dơ̆, phơng ơn 4 dơ̆, ƀồm sơnơm 2 dơ̆ tàm nam den kơphê hơ̆ sồng gơ ai uă plai. Bơh tŭ bơkiar kơphê sơntìl pa pah nam kờp bal lơh geh tus 15 tấn”.

Mờ rơndăp broă lơh sa sươn sre dipal, geh ală bơta chi priă jền uă bè kơphê, sầu riêng, bung, tam zơu ròng tu…priă lơh geh tàm Đinh Trang Thượng sùm gơguh uă. Nam 2024, kờp bal tơl lồ ù tam phan tàm do gơ in priă lơh geh 125 tơlak đong, kờp bal dồ nă cau 47 tơlak đong, geh 104% broă rơndăp lwoh jăt Jơnau lơh nền tàm pơrjum Đảng ƀộ sàh dê sồr.

Jăt ồng K’Đức, Ƀí thư Ci ƀộ thôn 2, sàh Đinh Trang Thượng, dùl tàm ală jơnau kwơmàng dong ƀòn lơgar geh bơta bơtàu tơngguh pràn kơldang tàm tơngai lài hơ̆ ngan là gơnoar broă lơh krơh bơh ală đảng viên dê. Jơh gùt thôn geh rlau 200 hìu làng bol, tàm hơ̆ geh 17 nă đảng viên ndrờm sùm lòt lài tàm broă bơtàu tơngguh lơh sa.

“Lơh jăt jơnau sồr lơh bơh Đảng ủy kâp hơđang dê, Ci ƀộ lơh pràn broă lam lơh bơkiar lơh tam gơl pa wơl sươn kơphê, ală đảng viên tàm thôn lơh krơh ngan, lơh jăt niam gơnoar broă lòt lài tàm lơh jăt mờ cèng wơl cồng nha niam ngan, rài kis làng bol dê geh yờ tơngguh tai, geh priă jền nàng ròng siam ai kòn in lòt bơsram tus gùng tus dà. Bơdìh mờ bơkiar kơphê, tŭ do làng bol tàm thôn gam lơh jăt tam tàm bơrlŭ bal uă bơta chi tam bè ƀơ, sầu riêng, macca, bơh hơ̆ cồng nha lơh sa ngai sơlơ geh tơngguh tai”.

Ồng K’Đô, Phó Ƀí thư Đảng ủy, Củ tịc Anih duh broă Làng bol sàh Đinh Trang Thượng, pà gĭt, bơh tơngai giă kơphê gơmù uă ngan, sàh neh ai lơh jăt jơnau lơh nền tàm pơrjum mìng dùl tơnggume bè tam gơl chi tam, hòi jà bơtàu tơngguh ală broă lơh lơh tơrlòng lài lơh sa pa bè tam zơu ròng tu, tam biăp khuah rbài, ngui sơntìl chi tam pa lơh geh cồng nha uă. Is ồn, gơnoar broă ală đảng viên dê là kwơmàng ngan tàm broă mblàng yal, bơto pơlam dong làng bol đòm jăt gơguh jak jak chài măy mŏk tàm lơh sa. Tàm nam 2025 do, bal mờ lơh pràn ală broă lơh bơtàu tơngguh broă lơh sa jăt gùng dà kơ̆ kơl jăp, sàh hòi jà bơtàu tơngguh ală broă lơh tơrlòng lài tam kơphê hữu kơ hơ̆ là ờ ngui sơnơm sền gàr phan tam nàng kờñ tơngguh bơta niam phan bơna, pơgồp bal mờ ală mpồl lơh sa kă bro tơrgùm blơi phan lơh geh bơh sươn sre nàng kờñ lơh geh drà kă bro geh sùm ai cau lơh broă sa in. Pơnđơl gơmù khà hìu rƀah 2% mờ tơngguh priă lơh geh kờp bal dồ nă cau geh 55 tơlak đong. Ồng K’Đô, pà gĭt: “Bơh bơta sồr lơh tơn bơh Đảng ủy dê mờ bơta sơm băt tê bal mŭt lơh bơh jơh ală anih lơh broă cíñ trị dê den uă đảng viên neh lơh krơh tàm broă bơtàu tơngguh lơh sa. Bơh hơ̆ làng bol ƀòn lơgar đòm jăt, pơgồp bơnah dong lơh bơtàu tơngguh bal lơh sa- mpồl bơtiàn ƀòn lơgar dê. Đinh Trang Thượng kung jơh nùs lam sồr làng bol tàm broă tơn jơh hìu ing, tàm nam 2024 neh lơh jăt tơn jơh 16 nơm hìu ing. Tàm nam 2025 do, rơ̆p pơn jăt tai lơh jăt tơn jơh 18 nơm hìu lơh ing, bol hi pơnđơl lơh jăt sir lài mờ pơrjum dờng đảng, tàm nhai 05 nam 2025 pal lơh sir”.

Mờ ală pơlam gùng dipal, bơta tơrgùm bal pràn dồ nùs bal bơh đảng ƀộ, gơnoar ătbồ mờ làng bol dê, Đinh Trang Thượng gam rơhời brồ guh, gơgơs là dùl tàm ală sàh ƀòn lơgar pa lơh krơh lài bơh kơnhoàl Di Linh dê. Tŭ do, sàh Đinh Trang Thượng gam pơn jăt tai lơh jăt niam gơnoar broă đảng viên dê, sơlơ tàm jàu jak chài măy mŏk, lơh pràn lơh sa jăt gùng dà kơ̆ kơl jăp, pơgồp bơnah bơ̆t bơtàu ală ƀòn lơgar ngai sơlơ tam gơl pa, pơnđơl lơh geh cồng nha uă ngan rlau jơh chờ hờp wă rò Pơrjum dờng gùt lơgar dơ̆ XIV Đảng dê.