Bơh bồ nam tus tŭ do Tiah lòt nhơl ƀòn brê bơnơm Dà lơgar Măng Đen, kơnhoàl Kon Plông, neh wă mpồl năc lòt nhơl “gơguh uă ngan” mờ rlau 374 rơbô dơ̆ geh rlau dùl nggùl khà năc lòt nhơl tus mờ càr Kon Tum. Ồng Đặng Quang Hà, Củ tịc Anih duh broă Làng bol kơnhoàl Kon Plông, pà gĭt, 3 nam pa do gah lòt nhơl bơh kơnhoàl dê gơguh pràn, ngan là nam 2022 kơnhoàl wă 600 rơbô dơ̆ năc lòt nhơl, nam 2023 là 1 tơlak dơ̆ năc mờ nam 2024 là 1 tơlak 200  rơbô dơ̆ năc lòt nhơl.

Mơya jat ồng Đặng Quang Hà, bơta do ờ geh gơtha là kơnhoàl neh ngan ngồn rơ̆p tă pơgồp tàm gơguh lơh sa 2 khà sồ bơh càr dê dilah ờ mhar lơh jat ală broă lơh niam nàng lòt nhơl in bơtàu tơnguh kơ̆ kơl jăp, jŏ jòng:“Ờ geh broă lơh, ờ ai geh jơnau kờñ den bol he rơ̆p ờ sền gàr geh ù tiah niam bơnĕ. Bơt bơtàu rùp hin lòt nhơl sồr pal lơh geh uă broă lơh tàm broă atbồ Dà lơgar dê, tàm broă bơt bơtàu mat kă bro, bơt bơtàu rùp hin bơh Tiah lòt nhơl Măng Đen dê. Dilah bơh tŭ do tơn ờ bơt bơtàu mat kă bro, bơt bơtàu rùp hin mờ bơt bơtàu niam chài tơm bơh bơr tàm Tiah lòt nhơl Măng Đen den mờr tus bol he kung rơ̆p gơtìp wơl tai bàr pe broă ờ niam tàm uă tiah dê”.

Nàng pơgồp tàm gơguh lơh sa 2 khà sồ bơh càr Kon Tum dê tàm nam 2025, Tiah lòt nhơl ƀòn brê bơnơm Dà lơgar Măng Đen gam lơh geh tai bơta gơ kờñ mờ năc lòt nhơl. Bè bơta atbồ Dà lơgar, ală kấp gơnoar atbồ jơh nùs lơh ngan lơh jat niam broă lơh atbồ rơndăp ù tiah; ngui gùng dà, broă lơh hòi jà tă pơgồp geh cồng nha priă jền bơcri priă bơt bơtàu phan bơna, phan bơna drơng broă bơtàu tơnguh lòt nhơl...

Gơwèt mờ 139 anih kă bro drơng broă ơm kis ing tàm ù tiah do dê sồr pal tơnguh uă bơta niam mờ niam chài drơng năc lòt nhơl. Ồng Nguyễn Văn Tuấn, Kwang lam bồ đơng lam Golden Boutique Hotel Măng Đen, pà gĭt:“Bơta tờm kwơ màng ngan nàng gàr năc lòt nhơl, nàng kờñ năc lòt nhơl tus wơl mờ Măng Đen là jơh ală cau lơh broă pal lơh broă mờ plai nùs bơh he dê, sền năc bè là cau rềp mềr mờ cau tàm hìu bơnhă sền gàr jơh nùs niam ngan sền gròi jơh mờ ală bơta. Bol añ sùm kờñ ngan mờ kơlôi rcang pah ngai, sùm sùm tam gơl pa nàng lơh geh muh mat pa. Gơwèt mờ bơta pràn bol añ sùm bơto bơtê tơnguh uă bơta chài broă lơh nàng lơh broă ờs mờng rlau tai’.

Nàng năc lòt nhơl in tus mờ Măng Đen ờ mìng “gơguh uă” tàm ală dơ̆ ơm rlô, dơ̆ lơh chờ dờng Sa tềp Dà lơgar dê lơm mờ kờñ geh sùm jơh ală nhai tàm nam dê, broă lơh bè li la uă phan bơna lòt nhơl gam geh càr Kon Tum mờ Mpồl Lòt nhơl Măng Đen lơh pràn lam lơh. Bal mờ “7 tơnau 3 ñrùh”, ală Tiah lơh sa măng, Suơn đơs crih tam ya Măng Đen, tiah lòt nhơl mpồl bơtiàn Vi Rơ Ngheo, Kon Vơng Kia, dơ̆ lòt nhơl sền gĭt niam chài, ù tiah brê bơnơm... pa lơh geh neh lơh li la uă tai phan bơna lòt  nhơl dong Măng Đen gơ hòi gơ jà mờ kun jơng năc lòt nhơl dê.

Mò Bạch Thị Mân, Phó Kwang lam bồ Sờh Niam chài, Tàp pràn să jan mờ Lòt nhơl càr Kon Tum đơs nền, mờ nùs nhơm lơh ngan bal mờ bơta ƀuơn bơta pràn geh lài, Măng Đen rơ̆p geh tă pơgồp kwơ màng tàm jơnau kờñ gơguh lơh sa 10% bơh càr dê tàm nam 2025: “Măng Đen tơrgùm tơl làm bơta ƀuơn, bơta pràn. Bol añ kung neh tơrgùm lơh ală phan bơna mùl geh ngan, lòt nhơl niam chài, lòt nhơl kah yau, lòt nhơl hwềng nùs, lòt nhơl tàp pràn să jan... Bơh ală bơta, bơta kwơ bè phan geh is, ù tiah brê bơnơm niam ngan den ală anih lơh broă atbồ Dà lơgar geh bơta pơgồp bal đah anih lơh broă atbồ Dà lơgar, mpồl lơh sa kă bro bal mờ gơ̆p dùl nùs bal lơh jat geh ală jơnau kờñ geh ai”.

Lòt nhơl geh càr Kon Tum sền gĭt là gah broă tờm tàm jơnau kờñ gơguh kă bro phan mờ drơng broă mờr 13% tàm nam 2025. Mờ bơta ƀuơn geh lài mờ broă lơh jŏ jòng bơtàu tơnguh niam ngan, Tiah lòt nhơl ƀòn brê bơnơm Dà lơgar Măng Đen, kơnhoàl Kon Plông gam bal mờ ală kơnhoàl, ƀòn dờng ndai bơh càr Kon Tum dê jơh nùs lơh geh jơnau kờñ wă 3 tơlak dơ̆ năc lòt nhơl nàng pơgồp tàm gơguh lơh sa 10% bơh càr dê tàm nam do. Tơl năc lòt nhơl tus mờ Măng Đen ờ mìng sền bơta niam bơnĕ bơh ù tiah brê bơnơm dê lơm mờ gam pơgồp bơnah tàm bơta bơtàu tơnguh tai lơh sa- mpồl bơtiàn bơh càr do dê.