Geh 2 nă kòn gam bơsram ơdŭ mẫu giáo Dà lơgar, pah nhai hìu bơnhă bi Nguyễn Ngọc Quỳnh, ơm tàm kơnhoàl Nam Đàn, càr Nghệ An pal tă pơgăp 4 tơlak đong priă bơsram mờ ơm sa klo ngai tơn tàm hìu bơsram ai kòn in. Jơh bal 2 nă ùr bơklau ndrờm lơh cau lơh phan, priă lơh geh ờ kơ̆ kơl jăp den pah nhai ndrờm ngui sa tềm pềr nàng lời priă jền ai kòn in lòt bơsram. Den tàng tŭ geh jơnau yal kơnòm dềt mầm non mờ kơnòm bơsram kấp 1, kấp 2, kấp 3 Dà lơgar rơ̆p geh ờ duh pal tă priă bơsram bơh nam bơsram tus do, bi gơlơh chờ hờp tài bơh rơ̆p tơrmù ƀà geh dùl bơnah lơi priă tă ai broă bơsram sră ai 2 nă kòn in.

Bi Nguyễn Ngọc Quỳnh, đơs: “Bè hìu bơnhă oh den ùr bơklau lơh broă sa priă nhai mờ neh geh 2 nă kòn, geh ờ duh pal tă priă bơsram ai kơnòm dềt in den ùr bơklau geh tơrmù dùl bơnah lơi bơta kơn jơ̆ lơh sa ai hìu bơnhă in, den tàng gơlơh chờ hờp ngan tŭ geh broă lơh pa do”.

Chờ hờp kung là bơta ngoh rơngăc bal bơh uă mè bèp gơwèt mờ Jơnau lơh nền bè broă ờ duh pal tă priă bơsram ai kơnòm dềt mầm non mờ kơnòm bơsram bơh kấp 1 tus kấp 3 Dà lơgar bơh Ƀộ Cíñ trị dê. Bi Nguyễn Thị Hương ơm tàm sơnah ƀòn Đồng Tâm, quận Hai Bà Trưng, Hà Nội đơs: “Hìu añ geh 2 nă kòn, 1 nă bơsram kấp 2, 1 nă bơsram ờ dŭ 10. Tŭ mut nam bơsram pa do geh ờ duh pal tă priă bơsram tai den añ kung chờ hờp ngan. Bulah priă bơsram bơh ală kòn dê tàm 1 nhai là ờ uă, mơya mờ priă ngui sa pah ngai tàm Hà Nội kung hoàc ngan sơl, mờ hìu añ ơm gam pal apah den kung pơgồp bơnah lơi ai hìu bơnhă in tềm pềr geh dùl bơnah priă ngui sa”.

Ai bi Ngô Thị Mai ơm tàm kơnhoàl Thạch Thất, Hà Nội pà gĭt: “Añ kung chờ hờp ngan sơl. Tơrmù geh dùl khà priă kờp tàm 1 nam bơsram den kung là dùl khà priă dờng, nàng ai hìu bơnhă añ in tềm pềr mờ priă tă ngui ai bơnah ndai ai ală kòn in. Priă lơh geh tàm tiah ƀòn lơgar bè bol añ kung dô ết sơl, den tàng là mờ khà priă bơsram bè hơ̆ gơwèt mờ bol añ kung kwơ màng ngan sơl”.

 Bal mờ broă ờ duh pal tă priă bơsram ai jơh ală kơnòm bơsram bơh kấp mầm non, kấp 1, kấp 2 mờ kấp 3 Dà lơgar, ală kơnòm bơsram tàm hìu bơsram làng bol dê lơh is kung rơ̆p geh pà bơtơl priă bơsram bơh hìu bơsram Dà lơgar jat jơnau cih bơh Adat boh lam dê; bơnah gơlin rlau priă bơsram đah hìu bơsram Dà lơgar mờ hìu bơsram làng bol dê lơh is rơ̆p bơh hìu bơnhă kơnòm bơsram dê tă tơm. Jat bi Trần Văn Nghĩa ơm tàm càr Hà Nam, broă lơh do rơ̆p pơgồp bơnah gàr niam bơta ring bal đah kơnòm bơsram tàm hìu bơsram Dà lơgar mờ hìu bơsram làng bol lơh is: “Kơnòm bơsram hìu bơsram làng bol dê lơh is rơ̆p geh dong kờl dùl bơnah priă tă bơsram den añ gŏ do là dùl bơta chờ hờp uă ngan, gơtùi đơs là bơta niam ngan rlau jơh. Tài bơh ngan ngồn den rơ̆p tơrmù ƀà priă tă ờ mìng ai añ in lơm mờ gam ai ală mè bèp geh kòn bơsram tàm hìu bơsram làng bol dê lơh is tai, dơ̆ 2 añ kung gŏ là rơ̆p ring bal rlau đah ală sau bơsram tàm hìu bơsram lơh is mờ hìu bơsram Dà lơgar dê”.

Jat tơrgùm kờp bơh Ƀộ Bơto bơtê mờ Bơsram, broă lơh do rơ̆p geh kwơ tus pơgăp 23 tơlak 200 rơbô nă kơnòm bơsram bơh mầm non tus kấp 1, kấp 2, kấp 3 (ờ hềt geh bal cau bơsram gam bơsram tàm ală anih tờm bơto bơtê broă lơh mờ bơto bơtê sùm), rơ̆p pơgồp bơnah tơrmù bơnah bơta kơn jơ̆ priă jền ai ală hìu bơnhă in, di pal mờ bơta niam bơh broă lơh dê, gùng dà broă lơh bơh Đảng, Dà lơgar dê gơwèt mờ bơto bơtê mờ di pal mờ gùng dà bal bơh ală lơgar bơtàu tơnguh dê.