Broă lơh dờng Ơruh pơnu lơh broă dong kờl is kàl rlô bơkang nam 2026 tàm càr Dăk Lăk gơ hòi gơ jà rlau 130 rbô dơ̆ đoàn viên, ơruh pơnu tus bal, mờ mờr 4 rbô broă lơh gàr lơngăp lơngai rài kis mpồl bơtiàn. Ală mpồl Kàl rbô bơkang tơlir lam lơh 144 broă lơh, bơnah broă mờ priă tă lơh mờr 2 tơmàn đong. Broă lơh gròi sền, kơlôi rơcang kơnòm dềt in geh lam lơh mờ 318 ơdŭ bơto re dà ờ sa priă mờ mờr 5 rbô bơnah priă dong kờl bơsram pà ală kơnòm bơsram kal ke in.

Jơh 102 sàh, sơnah ƀòn tàm càr ndrờm lam lơh mpồl Làng bol bơsram sồ, dong kờl tơnguh pràn jak sồ, tam gơl wơl sră pơ àr gơnoar atbồ mờ tơm priă ờ ngui priă mat ai rlau 145 rbô dơ̆ ơruh pơnu, kơnòm pa tàu, kơnòm dềt mờ làng bol in.

Tơnơ̆ broă lơh dờng kàl rlô bơkang, broă lơh dong kờl làng bol tàm măi mok sồ pơn jat tai geh lơh pràn tàm Broă lơh dờng 44 ngai mang “Ơruh pơnu Dăk Lăk lam lài tam gơl sồ”. Ală mpồl neh dong kờl lơh rlau 64 rbô 700 sră nggal broă drơng ala dà lơgar pờ tơn tàm internet, pơlam rlau 27 rbô 200 hìu bơnhă kă bro, cau tac bro dềt ngui tơm priă QR halà phan tac phan sồ.

Jat bi Y Lê Pas Tơ, Phó Bí thư Duh broă sùm Tỉnh đoàn, Chủ tịch Mpồl tam klac ơruh pơnu Việt Nam càr Dăk Lăk, ală mpồl gam sền gròi pơlam nàng tơnơ̆ tŭ geh dong kờl, làng bol gơtùi lơh is ală broă tàm măi mok sồ:

“Tơnơ̆ ală broă lơh dờng kàl rlô bơkang den bol hi kung neh ai ală bơyô pơn jat tai lam lơh ală broă lơh, bơh tơnơ̆ “kàl rlô bơkang sồ” ntrờn tus broă lơh dờng 44 ngai mang den ală bơyô tàm pơn jat tai ală broă lơh he dê. Bol hi kung neh sồr, tơnơ̆ ală broă lơh dờng do den ờ di là kơnòl broă he dê neh tơn jơh, mờ kơnòl broă dong kờl tàm ƀòn lơgar, tàm mpồl lơh broă, is ồn là gơ rềng tus tam gơl sồ là dùl kơnòl broă sùm mờ pal pơgồp bal mờ ală kơnòl broă, ală jơnau sồr lơh kâp ủy mờ gơnoar atbồ ƀòn lơgar dê tai”.