Do là broă lơh geh tơmŭt bal bơh 4 broă lơh jơnau kờñ dà lơgar lài do dê gơ gơs dùl mpồl ring bal, geh: Bơt bơtàu ƀòn lơgar pa, tơrmù rƀah kơ̆ kơl jăp, bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm; Bơtàu tơnguh Niam chài; lơh pa ngan, tơnguh uă cồng nha bơto bơtê mờ bơsram; Sền gròi pràn kơl dang să jan, khà kờp làng bol mờ bơtàu tơnguh. Kờp jơh priă tă lơh tơngai bơh nam 2026-2030 là mờr 880 rơbô tơmàn đong (tàm hơ̆ kes priă dà lơgar là 345 rơbô tơmàn đong); Ai lơh lài ngan ai ală ù tiah kal ke in. Priă bơh broă lơh dê tơrgùm di jơnau kờñ bơcri priă ai làng bol in dờp lèng, jơh nùs lơh ngan ờ gŏ ngui nàng tă tờm priă nhai halà broă lơh sùm bơh mpồl kwang bàng lơh broă dê.

Dà lơgar jàu gơnoar ai kấp sàh in atbồ ală rơndăp broă lơh dềt, măi mok bal hiă. Ală rơndăp broă lơh hơđơm 500 tơlak đong digơlan jàu tơn ai mpồl bơtiàn làng bol ơm kis in lơh jat. Tàm pơrjum, ồng Lê Minh Hưng sồr tơrgùm ală broă lơh jơnau kờñ dà lơgar pal lơh geh bơta tam gơl ngan ngồn tàm atbồ, tơrmù ƀà broă lơh bơh sơn rờp, tơrmù ƀà sră pơ àr mờ bơsong bơta tam pà rah rài, tàm rơndăp rơndồl; tơnguh uă cồng nha ngui ală bơta pràn; tơrgùm bơta pràn dà lơgar nàng bơcri priă di tiah, di anih. Thủ tướng jàu tơn ai Chủ tịch Anih duh broă Làng bol ală càr, ƀòn dờng in lơh Kwang lam bồ Mpồl sồr kấp càr mờ lơh sir broă pồ tơl kwang bàng lơh broă lài mờ ngai 25/10 do. Ală tiah pal tơrgùm ai priă bơcri lơh jơh tơn pơgăp 12 rơbô tơmàn đong priă tàm ntrờn bơh tơngai bơh nam 2021 - 2025 tus nam do.