Ală ngai do mìu dờng jŏ jòng, tàm bơnơm Một, sơnah ƀòn Quy Nhơn, càr Gia Lai geh tai jơnau kơlôi rơcăng sùm ngòt tơrlah tơrlơm. Tềng chàr bơnơm, uă hìu ơm wah wời. Tềng jơng bơnơm, bàr pe nơm hìu gơtìp ù lŭ bồr tơ̆p dồ bơnah, uă hìu bơnhă pal ntrờn lòt tus tiah ndai.

Mò Phạm Thị Thuỳ, Lam bồ Jơnum làng bol tiah drà 19, sơnah ƀòn Quy Nhơn pà gĭt, bơnah uă hìu ơm tàm kơnhoàl ù tiah do bơh làng bol rồ ù, lơh is hơ̆ sồng tăc blơi, kă bro wơl uă dơ̆. Nam 2025, tŭ jơnau tơrlah tơrlơm gơbàn kơn jơ̆ ir, neh geh 9 hìu ntrờn lòt tus tiah ndai, tŭ do gam 27 hìu ơm kis tàm do. Broă ờ tơl sră pơ àr dipal mờ adăt boh lam lơh broă rơndăp lơh dong kờl, rơndăp anih ơm ai làng bol in tìp kal ke:

 “Jơnau lơh nền bơh càr dê bè broă ntrờn hìu làng bol dê uă ngan ală hìu làng bol dùl nùs bal. Mơya, geh bàr pe hìu làng bol ờ dồ nùs bal tài bơh cau rồ ù mờ sồr pà ù. Tàm tŭ càr mìng dong kờl dùl bơnah lơi gời lơm, tài bơh làng bol ờ geh sră ngui ù (mờng hòi là sră pơrhê) den tàng jăt jơnau ai den mìng dong kờl dùl bơnah priă tă nàng lơh halà ơm tàm ală anih niam lơngăp lơngai rlau, ờ gŏ ơm tềng ală anih sơbơng roh tơrlah tơrlơm”.

Tiah làng bol ơm kis tàm bơnơm Một gơgơs neh rlau 20 nam do. Tềng đăp jơnau pơhìn tơrlah tơrlơm ngai sơlơ ờ ƀươn soh ngan, ƀòn lơgar gam sơrbăc mhar pơgồp bal mờ Sờh Bơ̆t bơtàu, Sờh Broă lơh sa sươn sre mờ Tiah ơm kis càr Gia Lai kờp sền wơl, dan broă rơndăp lơh ntrờn ală hìu làng bol tàm tiah sơbơng roh, mơkung kơlôi sơnơng gùng dà broă rơndăp lơh lơh tam gơl pa wơl, lơh bơka wơl kơnhoàl ù tiah do.

Ồng Nguyễn Đức Toàn, Chủ tịch Anih duh broă Làng bol sơnah ƀòn Quy Nhơn, pà gĭt:

“Tŭ do, càr gam sồr mhar jàu ală sờh, gah mờ Anih duh broă Làng bol sơnah ƀòn Quy Nhơn kờp sền wơl, dan geh broă rơndăp lơh nàng lơh jăt kơnòl broă ntrờn ală hìu làng bol tàm tiah do. Tŭ mìu càl rbŭt dờng gơ tus den sơnah ƀòn neh crăp rơcăng broă rơndăp lơh ntrờn jơh ală hìu làng bol ơm tàm tiah pơhìn tơrlah tơrlơm ù digơlan gơbàn nàng tus anih ơm niam lơngăp lơngai”.

Broă rơndăp lơh ntrờn làng bol lik bơh tiah tơrlah bơnơm Một ờ mìng là jơnau sồr jal mhar lơm nàng sền gàr màng kis, jơtài mờ kờñ pal geh broă rơndăp lơh dong kờl mờ ai anih ơm pa dipal, sền gàr rài kis jŏ jòng ai làng bol in. Nàng bơta kơ̆p kờñ ơm kis iang neh gơgơs ngan ngồn, gơnoar ătbồ mờ ală gah geh gơnoar pal mhar tă bơsong kal ke, lơh mhar ală gùng dà broă rơndăp lơh ntrờn, ai tiah ơm kis pa, dong làng bol kơ̆ kơl jăp rài kis.