Nam 2026, lơh sa suơn sre tiah Tây Nguyên mờ Jăt gah dà lềng Đah jum tàm gùl lơgar pơn jăt tai gơguh kơl jăp. Bă ù lơh kòi sre geh di pơgăp 782 rơbô lồ, cồng nha geh mờr 65 tạ tàm 1 lồ, khà geh rơlao 5 tơlăk tấn. Tòm chi sa plai geh rơlao 3 tơlăk tấn. Gơwèt mờ phan tam jŏ tơngai, kơphe pơn jăt tai gàr gơnoar tờm tàm ală phan geh lơh bơh broă lơh sa suơn sre tăc mờ lơgar bơdìh dê, priă geh rơlao 6 tơmàn 500 tơlăk Dolar Mỹ.

Gùt tiah geh rơlao 2 rơbô màh sồ tiah tam mờ bă ù ơnàng 57 rơbô lồ mờ rơlao 600 hìu dăp klơm. Mơya, lơh sa tiah Jăt gah dà lềng Đah jum Tàm gùl lơgar mờ Tây Nguyên kung gam tìp kal ke tài khà măi mok ngui tàm broă sih tam gam ờ uă, broă ngui sơntìl ờ hềt di pal mờ jơnau kờñ, kòp gơtờp tàm phan tam tờm mờ ală khà niam geh ai ngai sơlơ nền nòn bơh drà kă bro tăc phan mờ lơgar bơdìh dê. Tềng đăp mờ bơta gơtìp El Nino lơh gơtìp prang, trồ tiah ờ niam, ală càr tàm tiah do dan bơsong kal ke bè bơtơ̆t rơbòng dà, atbồ phan lơh broă sa suơn sre mờ bơyai lơh sa gơdờp bal. tàm pơrjum, Bộ Broă lơh sa suơn sre mờ Tiah ơm kis đơs nền jơnau kờñ tơnguh uă bơta phan phan geh lơh bơh broă lơh sa suơn sre, bơyai lơh di mờ broă lơh mờ tơnguh broă pơgồp bal đah làng bol lơh broă sa, mpồl lơh broă bal mờ mpồl lơh sa kă bro. Tềng đăp mờ bơta di gơlan El Nino lơh gơtìp prang uă, ală càr pal rơcang lài bơ̆t bơtàu broă lơh lài nàng rơcang pleh, sền wơl khà dà mờ broă lơh bơtơ̆t rơbòng dà, lơh wơl kàl lơh sa, ai phan tam gơdờp bal, bañ lời gơtìp ờ thàn tŭ trồ pang gơtìp.