Bơh nam 2017 tus tŭ do, pah nam Hìu măi Alumin Nhân Cơ neh lơh gơlik 650 rơbô tấn quặng goh, tă pơgồp pơgăp 500 tơmàn đong tàm kes priă càr dê mờ lơh geh broă lơh ai rlau 1 rơbô nă cau lơh broă. Kờp dŭ, tơngai bơh nam 2025-2029, rơ̆p tơnguh cồng nha lơh broă gơguh tus 1 tơlak 200 rơbô tấn dồ nam, mơkung bơcri priă lơh hìu măi lơh gơlik trà mờ bơta pràn pah nam 500 tơlak tấn.

 Phó Thủ tướng ồng Nguyễn Hoà Bình cih dờp ală cồng nha niam ngan mờ Tập đoàn dê neh lơh geh tàm broă lơh sa kă bro; mơkung sồr Tập đoàn pơgồp bal niam mờ Anih duh broă Làng bol càr Dăk Nông ngan tàm broă bơsong ală broă bè ù tiah bơh làng bol dê tàm tiah lơh rơndăp broă lơh. Phó Thủ tướng kung đơs sùm bơta kwơ màng bơh broă lơh pràn lơh gơlik jrô tàm gah trà, sồr Tập đoàn sơlơ tơnguh tai bơcri priă, bơtàu tơnguh nàng tơnguh uă bơta kwơ phan bơna trà, bơh hơ̆ pơgồp bơnah tàm bơta bơtàu tơnguh kơ̆ kơl jăp bơh gah lơh sa mờ măi mok do dê.