Phó Thủ tướng sồr tơrgùm mblàng yal, đơs di ală bơta kòi phe tŭ do tàm drà kă bro dunia mờ tàm lơgar. Bal mờ hơ̆ lơh loh bè lơi tŭ mut tàm kàl tơnhào den gơlik geh bơta kòi ờ geh tơnhào mơya tăc geh giă, geh giă mơya kòi ờ geh tơnhào lơh kal ke ai cau lơh broă sa in. Bơdìh hơ̆, pal jat sền, kờp dŭ lài mờ tam gơl niam drà kă bro kòi phe, dùl bă rcang lài, kơ̆ kơl jăp. Mơkung pal geh broă lơh dồ ròt bal jŏ jòng, ala tài mìng bơsong bơta digơlan gơlik geh jal mhar nàng sền gàr gah phan kòi phe lơgar Việt Nam dê, sền gàr geh cau lơh broă sa suơn sre.

Jat jơnau yal, bơta phan phe tàm dà lơgar he dê kung gam gàr niam  broă lơh gơlik mờ tăc mờ lơgar ndai gơguh kơ̆ kơl jăp; mìng is nam 2024, tăc phe mờ lơgar ndai bơh lơgar Việt Nam dê rlau 9 tơlak tấn mờ priă lơh geh bơh tăc phe mờ lơgar ndai lơh geh khà 5 tơmàn 750 tơlak dolar Mỹ. Tàm 2 nhai bồ nam do, tăc phe mờ lơgar ndai bơh lơgar Việt Nam dê kờp dŭ lơh geh 1 tơlak 100 rơbô tấn.