Kơnhoàl Krông Bông, càr Dăk Lăk geh ù tiah ơnàng tềng jơng bơnơm Chư Yang Sin dê. Ală ngai rơcang lơh chờ kơphe, tơnkah 50 nam tơnklàs càr, tơl gùng lòt ndrờm geh yồng bồng bi pơrhê crư; ală tiah lòt nhơl geh lơh niam, lơh pa mờ uă bơta phan nàng rơcang wă rò cau năc. Bơnơm ñhoa, brê dà lơgar bal mờ ală ƀòn kis jăt jơng bơnơm Chư Yang Sin, ờ mìng là ală tiah tus niam ai cau năc lòt nhơl kờñ gơboh mờ lòt nhơl mpồl bơtiàn dê, nhơl sền ù tiah geh is… mờ gam là hìu bơsram tàm mùl màl bè rài lài do 10 nam tam lơh mờ ling lơgar Mỹ sò tơm (1965-1975), do là tiah kơl dìng kăc màng, brê kơrian mpồl ling sò tơm.

Neh mờr 100 sơnam, ồng Lê Chí Quyết, phó Ƀí thư Tỉñ ủy càr Dă Lăk lài do kung gam kah sùm 10 nam lơh broă bơh ồng dê tàm tiah pôs đồng ling klàng do: “Anih lơh broă duh broă sùm Tỉñ ủy, anih lơh broă đơng lam bồ sơnrờp ngan đah jum do, geh bal Cơl dŭ lơh broă tỉñ ủy, lam bồ cơl dŭ lơh broă, phó lam bồ cơl dŭ lơh broă, ală bơnah broă lơh sră nggal, cih jơnau, prăp gàr, broă lơh tờm, điện thoại. Pơrjum sơnrờp ngan bơh duh broă sùm Tỉñ ủy bơyai lơh tàm do cri bơyai 2 broă, lài ngan là pal tam dră mờ ling sò tơm, gàr kơl jăp pôs ling đah Jum nàng bañ lời ling sò tơm sơgràm phà, mờ lơh rơhời gơs tiah pôs đồng ling klàng dê, nàng tơbŏ bal geh pôs ling dờng pràn càr dê bơh đah tô tus đah jum”.

Mờ Cau pơgru ồng Hà Ngọc Đào, Kwang lam bồ Sờh Bơto bơtê mờ Bơsram càr Dăk Lăk lài do đơs, tiah pôs đồng ling klàng H9-Krông Bông là hìu bơsram mờ kung là tiah tam lơh bal mờ kung là tiah tam phan suơn dờng, tài ală cau pơgru kơnòm să tus tàm càr Dăk Lăk neh lơh 3 kơnòl broă: bơto bơsram, lơh geh phan sa mờ tus bal tam lơh. Ồng Hà Ngọc Đào kah wơl, H9 kung là ù tiah lơh geh uă cau jăk chài: “Añ tus tàm do nam 1965, tus ngai tơnklàs là ơm tàm do 10 nam. Uă cau sồt să bơh tàm do mờ kung gơs dờng pràn bơh tàm do sơl. Geh ală cau jăk chài, bè cau jăk chài Y Ơn, dờng pràn bơh broă lơh ling gàr ƀòn, broă lơh kăc màng tàm Krông Bông. Cau jăk chài Ama Lê, cau jăk chài mpồl ling kung gơs dờng pràn bơh tàm do hơ̆ sồng phi să mờ geh tơnpồ gơs cau jăk chài. Den tàng tŭ rê tàm do, nùs nhơm añ ngoh rơngăc ngan, kah ală cau ling tàm mpồl, kah ală oh mi, kah làng bol, kah tiah tam lơh”.

Tàm rài tam lơh cui rơcai, làng bol ală ƀòn kis tềng jơng bơnơm Chư Yang Sin kung ờ ngòt glar bòl, màng kis, sền gàr tiah pôs đồng ling klàng tam lơh, rề ơnàng tiah geh tơnklàs. Làng bol ală jơi bơtiàn kis tàm do neh kơl dìng Kăc màng, nàng 3 dơ̆ pơrjum dờng Đảng ƀộ càr geh bơyai lơh tàm do lơngăp lơngai. Ồng Y Suôm Niê, kis tàm ƀòn H’ Ngô A, sàh Hoà Phong, kơnhoàl krông Bông yal: “Tơl nă cau lơh tơl broă, jăt mờ bơta pràn bơh să tờm dê. Làñ srồng den jào broă, bè cau dềt den làñ 100 nơm, cau dờng den 1 rơbô nơm, pơgồp bal nàng cèng tồt srồng tàm tiah nhàr đah ling sò tơm mờ ling kăc màng he dê. Hơ̆ sồng lòt tam bùm mblàng, cau dềt tam 500 tờm, cau dờng tam 1 rơbô tờm. Nàng geh bùm hơ̆ rơcoh dềt ìs rañ cèng nàng dong kờl cau ling lòt tam lơh in”.

Bơh broă tam klăc bal, dùl nùs bal bơh ling klàng bal mờ làng bol dê neh lơh geh bơta ƀuơn nàng Tỉñ ủy càr Dăk Lăk đơng lam làng bol ală jơi bơtiàn lơh geh bơh pha lin do tus pha lin ndai, ai geh bơnàng jă lơh gơs pha lin Buôn Ma Thuột, tơnklàs càr Dăk Lăk, pơgồp bal tàm pha lin kàl prang nam 1975, dà lơgar tơrgùm bal.

Ồng Y Thức Êban, Phó Củ tịc Anih duh broă Làng bol kơnhoàl Krông Bông pà git, Tiah pôs đồng ling klàng rài tam lơh càr Dăk Lăk neh geh dờp là tiah tềl kah yau kấp dà lơgar dê bơh nam 2017, gơs tiah bơto bơtê bơhiàn jăk chài kăc màng rơnàng kơnòm să in. “Do là dùl bơta niam nàng bol añ pơn jăt tai bơto bơtê bơhiàn kăc màng, tàm hơ̆ kwơ màng ngan là gơwèt mờ rơnàng kơnòm să. Tàm tơngai tus, broă bơtàu tơnguh lòt nhơl, đờm jăt bơta kwơ rài lài geh tơnguh bơta pràn kơl dang rơlao tai mờ broă lơh geh mùl màl ngan, tàm hơ̆ uă ngan là ală ơruh pơnu sùm bơyai lơh ală broă broă bơto bơtê bơhiàn ờs mờng, ưn ngài broă lơh dờng màng bơh ồng pàng neh khin cha tam lơh, phi să tài bơta khăt gơboh krơi is, tài bơta ring lơngai ƀòn lơgar, dà lơgar dê”.

Tơnơ̆ 50 nam tơnklàs, tiah pôs đồng rài tam lơh lài do càr Dăk Lăk dê (tŭ do là kơnhoàl Krông Bông) gam tam gơl pah ngai mờ broă dùl nùs bal bơ̆t bơtàu bơh gơnoar atbồ bal mờ làng bol dê. Ală suơn kơphe gam hòn gơs niam tơlir crư tàm ù tiah gơtìp ling sò tơm rơsìh sơnơm khih lài do. Ală tiah tềl rài do tŭ do neh gơs tiah tềl lời wơl, sùm gam tàm nùs nhơm, bồ tơngoh bơh làng bol bal mờ ală rơnàng tơnơ̆ do kis tàm kơnhoàl Krông Bông đơs is, càr Dăk Lăk đơs bal, là nùs nhơm pơnyờ să bè dùl rài tam lơh khin cha jăk chài.