Kàl dờp ling nam 2025 do tàm Dăk Lăk geh 2 rbô 553 nă ling lơh jăt kơnòl pal lơh broă ling klàng tàm ală mpồl lơh broă Ling klàng mờ Sền gàr tiah nhàr lơgar gơ wèt càr Dăk Lăk, bal mờ bàr pe mpồl lơh broă gơ wèt Ƀộ Ling klàng, Ling tiah V lơh pôs đồng tàm ù tiah càr dê.

Đại tá ồng Niê Ta, Kwang Đơng lam Gah đơng lam Ling klàng càr, Phó Củ tịc Mpồl duh broă Kơnòl pal lơh Broă ling klàng càr Dăk Lăk pà git, tàm kàl pơlam tàp do, ală anih lơh broă, mpồl lơh broă rơ̆p tơrgùm lơh niam broă lơh cíñ trị mờ bồ tơngoh, tơngguh uă kơnòl bơh ală kâp ủy, đơng lam, kwang bàng, cau ling dê gơ wèt mờ kơnòl broă pơlam tàp. Tơngai do, ală mpồl lơh broă neh dờp wil tơl khà ling mờ gam lam lơh ală sră bơto, jơnau bơto, broă lơh tơrlòng lài phan ngui bơsram kờñ pal geh, kờñ tơngguh uă bơta niam pơlam tàp gơ wèt mờ cau ling pa. Gơ wèt mờ ală cau ling pa, neh iang geh bồ tơngoh, nùs nhơm tơnơ̆ ală ngai sơnrờp ngài hìu bơnhă, crăp rơcăng mŭt tàm tiah pơlam tàp.