Kờp dŭ, tàm Nhai Ơruh pơnu nam do rơ̆p geh rơlao 36 rơbô 900 mpồl cau dan lik lơh ală broă lơh, bơnah broă ơruh pơnu ală kấp dê, mờ kờp jơh khà priă kờp dŭ geh rơlao 293 tơmàn đong.

Pal kah ngan, Nhai Ơruh pơnu nam do geh uă broă lơh pà bè: lơh jăt ală broă dong kờl dờp bal broă lơh jăt broă pơrlòng “Tus bal tơn jơh hìu ing, hìu ồm sèt ñhăt dà mìu” tàm gùt lơgar tàm nam 2025; tơrgùm lơh jăt dơ̆ pơrlòng “500 ngai mang pơrlòng lơh gơs 3 rơbô kơi sồ gùng rơndeh lòt mhar” pơgồp bơnah lơh jăt ngan ngồn  jơnau kờñ bơtàu tơnguh phan bơna gùng lòt dà lơgar. Tàm hơ̆ is ồn, ală broă lơh rơ̆p tơrgùm tàm broă lơh jăt geh cồng nha Jơnau lơh nền tàm pơrjum sồ 57 bơh Ƀộ Cíñ trị dê bè tam gơl pràn bơtàu tơnguh jăk chài, măi mok, tam gơl pa bơceh lơh mờ tam gơl sồ dà lơgar.