Mờ gơnoar bơh dùl nă ùr đơng lam đoàn dê, bi Rơ Châm B’Yich, ơm tàm sàh Ia Krái, kơnhoàl Ia Grai, sùm lòt bal mờ đoàn viên ơruh pơnu tàm tơl broă lơh, mơkung lơh krơh mờ bơta jơh nùs jơh tồr mờ geh kơnòl. Bi neh tơnggơs mpồl “Cau dong kờl is tơlir kờñ gơboh” dong kờl ală rài kis kal ke mờ ală broă lơh geh ngan bè pà phan ai ală hìu bơnhă rƀah, dong kờl kơnòm bơsram geh rài kis kal ke pơn jat tai lòt bơsram tàm hìu bơsram.

Mờ ală lơh ngan sùm, bi Rơ Châm B’Yich neh dờp geh uă sră jờng rơ bơh ală kấp dê. Bi Rơ Châm B’Yich pà gĭt: “Añ kơ̆p kờñ tă pơgồp dà kơl hề, bơta kơ̆p kờñ hơ̆, să tờm añ sùm jòi gĭt lùp bơsram ală bơta niam nàng làng bol gùt dar he dê bơsram jat bal. Geh deh tàm hìu bơnhă geh bơhiàn kăc màng, den gĭt loh ngan bơta kwơ màng bơh broă bơsram mờ lơh jat krơh niam nùs nhơm Hồ Chí Minh dê. Tus nam 2024 añ chờ hờp ngan geh dờp khà jờng 15 tàm 10, añ chờ hờp ngan. Añ kơlôi là añ lơh broă mìng là nàng tă pơgồp dà kơl hề lơm, ờ kơlôi là rơ̆p geh dờp khà jờng bè do, bè ne. Añ ưn ngài đơng lam bồ Dà lơgar, ƀòn lơgar neh sền gròi pơndờm pơnđiang. Să tờm añ tàm tơngai mờr tus rơ̆p pơn đơl pràn lơh ngan rlau tai tàm tơl broă lơh”.

Nam bơsram pa do, oh Nguyễn Hà Bảo Khanh, kơnòm bơsram ơdŭ 12C1, Hìu bơsram kấp pe Chuyên Hùng Vương, ƀòn dờng Pleiku, là kơnòm bơsram mìng dùl lơm càr Gia Lai dê geh Đoàn Ơruh pơnu Kộng sản Hồ Chí Minh Dà lơgar jàu pà sră jờng rơ “Kơnòm bơsram 3 niam” kấp Dà lơgar. Ờ mìng jak ngan tàm broă bơsram sră lơm oh gam tơryang tơryồng nhăp nhar tus bal mờ ală broă lơh đoàn, mpồl dê. Oh kung tus bal mờ ai geh uă khà jờng uă tàm ală dơ̆ pơrlòng kấp càr mờ kấp Dà lơgar bè kơlôi sơnơng jak chài măi mok, sơnđờm mut lơh broă mờ mòn lơh robot. Oh Nguyễn Hà Bảo Khanh đơs: “Tàm jơh ală dơ̆ pơrlòng den drờm cèng uă ngan bơta kwơ ai ală bơyô kơnòm bơsram in, ờ mìng là bơta pin dờn lơm mờ geh bal bơta sền gĭt tai. Tŭ tìp geh ală cau tàm mpồl tus bal mờ he den he kung rơ̆p lùp bơsram uă bơta ngan. Mơkung chờ hờp ngan tai tŭ mờ oh lơh geh sră jờng rơ kơnòm bơsram 3 niam kấp Dà lơgar, mờ oh kơlôi là do rơ̆p là bơta gơn kơnờm dờng ngan nàng oh in bơtàu tơnguh rlau tai tàm broă bơsram sră mờ lơh ngan uă rlau tai”.

Jat bi Hồ Thị Giang Thảo, Ƀí thư Tỉñ đoàn càr Gia Lai, ơruh pơnu tàm càr neh mờ gam lơh jat niam nùs nhơm lam lài dong kờl is, sùm bơsram mờ lơh broă bơceh lơh, tàm sơmbat tê bal bơt bơtàu ƀòn lơgar càr Gia Lai ngai sơlơ pas niam:“Bol añ rơ̆p pơn jat tai lam lơh ală broă lơh lơh broă nàng lơh jat Jơnau sồr sồ 05 bơh Ƀộ Cíñ trị dê bè broă lơh pràn bơsram sră, lơh jat bồ tơngoh, rài kis broă lơh Hồ Chí Minh dê. Sơlơ tơnguh tai bơta đơng lam bơh Đảng gơwèt mờ broă lơh bơto bơtê nùs nhơm bồ tơngoh kăc màng, nùs nhơm, rài kis, niam chài ai rơnàng kơnòm să in, pơgồp bal mờ jờng rơ, rề ơnàng ală krơh niam, jơnau yal niam bơh đoàn dê. Bơdìh hơ̆, pơn jat tai lơh pràn mờ lam lơh broă lơh dong kờl is broă lơh “3 lơh bal” nàng rơnàng kơnòm să càr Gia Lai in rơ̆p pơn jat tai tus bal mờ ală kấp gơnoar atbồ nàng bơt bơtàu, hòi jà ơruh pơnu tus bal bơt bơtàu ƀòn lơgar pa, tiah drà jak chài”.