Mang ngai 18/03, Đoàn Ơruh pơnu Kộng sản Hồ Chí Minh Dà lơgar bơyai lơh dơ̆ tơngkah kir sơnrai 94 nam Ngai tơnggơs Đoàn Ơruh pơnu Kộng sản Hồ Chí Minh Dà lơgar mờ jàu khà jờng Lý Tự Trọng nam 2025. Đơs tàm dơ̆ bơyai lơh, ồng Nguyễn Trọng Nghĩa, Lam bồ Mpồl Mblàng yal bơto bơtê mờ hòi jà Làng bol Dà lơgar sồr rơnàng kơnòm să pal là mpồl lòt lài tàm kơlôi sơnơng, ngui, bơtàu tơnguh jak chài, măi mok.  

Ồng Nguyễn Trọng Nghĩa sồr Mpồl Ơruh pơnu Kộng sản Hồ Chí Minh Dà lơgar pal is ồn sền dờng màng broă lơh bơto bơtê bồ tơngoh kăc màng, nùs nhơm, rài kis ai rơnàng kơnòm să in, bơto bơtê mờ lơh gơrề uă pràn ngan nùs nhơm lơh tờm is, pin dờn, lơh pràn is, pơn yờ să jơi bơtiàn mờ bơta kơ̆p kờñ tă pơgồp dà kơl hề ai Dà lơgar in; Lơh jat niam uă ngan gơnoar bơh ơruh pơnu dê tàm broă tus bal sền gàr ală bơta bồ tơngoh bơh Đảng, tàm dră wơl mờ ală nùs nhơm tìs, tam dră wơl; bơt bơtàu bơto bơtê mpồl kwang bàng Đoàn geh tơl nùs nhơm niam, geh tơl jak chài. Tàm dơ̆ tơngkah kir sơnrai, 100 nă kwang bàng đoàn pơn rơ jak neh chờ hờp ngan geh jàu khà jờng Lý Tự Trọng. Do là ală cau đơng lam ơruh pơnu sùm cèng tàm să jan he dê bơta kơ̆p kờñ ngan, bơceh lơh nàng lam lơh geh cồng nha bơh broă lơh đoàn mờ srơh ơruh pơnu, kơnòm pa dờng mờ kơnòm dềt dê.