Đơs tàm dơ̆ sơnđờm lơh, Phó Thủ tướng ồng Trần Hồng Hà đơs nền: Lơh chờ Kơphê Buôn Ma Thuột dơ̆ do là broă lơh geh bơta kwơ màng ngan, geh lơh di tàm tŭ tơngkah kir sơnrai tòm 50 nam tam lơh pha lin Buôn Ma Thuột. Lơh chờ ờ mìng là broă lơh jờng rơ gar kơphê Việt Nam dê lơm mờ gam là anih cribơyai gơcèng gơnoar broă gùt plai ù, tiah ală dà lơgar lơh gơllik mờ kă bro kơphê tơrgùm măt bal, yal bal bơta wèt sền ai dùl rài tơnơ̆ in kơ̆ kơl jăp bơh gah kơphê dê. Nam 2024, dơ̆ sơnrờp tăc kơphê mờ lơgar ndai bơh Việt Nam dê sơrlèt rlau 5 tơmàn dolar Mỹ, pơn jăt tai đơs nền bơngă là cau tăc kơphê uă dơ̆ 2 tàm dunia, mìng tơnơ̆ lơgar Brazil lơm gời.

Tàm hơ̆, Dăk Lăk- “Tiah tờm kơphê Việt Nam dê” tă pơgồp pơgăp 18% priă geh bơh tăc mờ lơgar ndai. Phó Thủ tướng sồr: tơngai tus, ală mpồl, ƀộ, gah, ală ƀòn lơgar, Tơrgùm ală mpồl kơphê- ka kau Việt Nam, ală mpồl lơh sa kă bro tam pà bal bơta wèt sền jŏ jòng, pơgồp bal lơh broă kơ̆ kơl jăp nàng bơ̆t bơtàu tiah tam kơphê niam uă; lơh ală anih lơh gơlik phan kơ̆ kơl jăp.