Broă lơh là broă kwơ màng tàm ală broă lơh tơngkah kir sơnrai 50 nam Ngai tơngklàs tiah đah Jum Dà lơgar, tơrgùm dùl Dà lơgar (30/4/1975 - 30/4/2025), nàng kờñ đơs nền gơnoar broă dờng màng, gơtha kwơ màng bơh Tam lơh pha lin Tây Nguyên dê tàm dơ̆ tam lơh tam dră mờ lơgar Mỹ dong klàs Dà lơgar.

Tàm dơ̆ cribơyai, ală kwang ling, cau jak chài mờ cau ala mat ală anih lơh broă, mpồl ling gơwèt Ling mpồl Tây Nguyên dê (bơh chờm là Ling mpồl 3) neh mblàng ală bơta lơh geh pha lin kah yau do dê. Bơh bơta đơng lam jak chài ngan bơh Đảng, bơta chài đơng lam kwơ màng, tus bơta bơceh lơh tàm broă tam lơh bơh Mpồl Ling klàng Làng bol Việt Nam dê. Dơ̆ cribơyai ờ mìng kah wơl ală tam lơh pha lin dờng ngan mờ gam ai geh ală jơnau bơsram kwơ màng ngan ai broă lơh bơt bơtàu mờ sền gàr Dà lơgar tŭ do dê; pơpgồp bơnah tam dră wơl mờ ală kai đơs ờ di bè jơnau kah yau; lơh kơ̆ kơl jăp nùs nhơm pin dờn tàm tơnơ̆ do Dà lơgar dê. Mờ do kung là tŭ tơngai niam nàng bơto bơtê bơhiàn kăc màng, lơh kah wơl nùs nhơm pơnyờ să jơi bơtiàn mờ nùs nhơm kờñ gơboh Dà lơgar, is ồn là gơwèt mờ rơnàng kơnòm să dê.