Nhai 02 nam 1975, Đại tướng Văn Tiến Dũng, ala măt Anih duh broă đơng lam Đảng Ling klàng Dà lơgar, yal jơnau lơh nền tơnggơs Gah Đơng lam dơ̆ tam lơh Tây Nguyên, mờ Trung tướng Hoàng Minh Thảo lơh Đơng lam mờ Đại tá Đặng Vũ Hiệp lơh Lam bồ Cíñ trị. Ƀộ Cíñ trị gĭt nền là Tây Nguyên là anih tờm, tiah kờñ pal hòi tơrgùm bơta pràn jơh ală bè phan bơna mờ nùs nhơm. Dùl ròt ală sư đoàn tờm ngan neh geh sồr tus tiah do, geh sư đoàn 320, 316, 968, mờ 10, bal mờ bơta pơgồp bal bơh uă ƀiñ củng ndai bè ling phàu kơnong, ling lơh gùng, mờ rơndeh sơtăng sơgiăp. Do là mpồl ling klàng dờng pràn ngan geh rơcăng nền nòn ngan nàng lam lơh dơ̆ tam lơh.

Trung tướng, cau khin cha jak chài mpồl phàu crong ồng Khuất Duy Tiến, lài do Lam bồ Cơldŭ pơgồp bal tam lơh, Dơ̆ tam lơh Tây Nguyên pà gĭt, tàm tŭ ling tơngklàs tơrgùm ntrờn làm bă tiah mpồl rơcăng ai dơ̆ ntàu tam lơh sò tơm Buôn Ma Thuột, den ală kâp đơng lam Ling tiah 2, Ling mpồl 2 gơnoar ătbồ ngụy Sài Gòn ờ gŏ gĭt bơta lơi bè dơ̆ ntrờn ling kung bè jơnau kờñ tờm bơh ling klàng dê là bơta lơi. Tơl bơta sền ngăc ndrờm sền tus đah Tô Tây Nguyên lơm. Tŭ mpồl jòi sền jơnau ndơ̆p ndơr Mỹ mŭt tàm Sài Gòn gŏ bơta ờ bè ờs bơh ling tơngklàs dê tàm jơh bal đah Tô mờ đah Jum Tây Nguyên neh geh jơnau đơs krơi is tàm broă gĭt nền anih lơi là gùng sò tơm tờm.

“Gah Đơng lam dơ̆ tam lơh đơs là cau sò tơm gam ờ hềt dòn nền ngan den sồr ai añ in cih dùl pang sră pơyua pơrlồm nàng lơh pơrlồm. Añ cih pang sră là pơyua ală mpồl ling sư đoàn 10, sư đoàn 320, ală ƀiñ củng là cau sò tơm neh gơtìp pơrlồm là sò tơm Buôn Ma Thuột mờ đah Jum Tây Nguyên den tàng bol sò tơm neh lam mpồl tus tàm hơ̆ nàng jòi sền mpồl bol he dê, den tàng ală mpồl ling pal sơrbăc mhar rơcăng tơl ală bơta jăt broă rơndăp lơh sò tơm”.

Lơh jăt jơnau sồr bơh Dà lơgar dê: “Pal lơh pơrlồm uă dơ̆ nàng lơh ai bol sò tơm in tơrgùm bơta sền ngăc tàm broă sền gàr tiah đah Tô Tây Nguyên”, rơcăng pơgồp bal tam lơh Tiah tam lơh Ƀ3 geh broă rơndăp lơh pơrlồm cau sò tơm, tàm hơ̆ gĭt nền loh: Kơnòl broă bơh lơh pơrlồm cau sò tơm là krơ̆ jơng, jơntăng hoài mpồl cau tờm Ling mpồl 2 cau sò tơm tàm Pleiku mờ Kon Tum, ờ ai bol sò tơm in ntrờn làm bă tiah rê tus Đức Lập, Gia Nghĩa, Thuần Mẫn. Jăt hơ̆, he neh jun sư đoàn 968 bơh đah Jum lơgar Lào rê tàm ala ai sư đoàn 320 mờ sư đoàn 10 in. Lời wơl jơh ală điện thoại măy mŏk rơdio, mpồl yal broă 15W, ală măy mŏk phan bơna yal tơnggĭt kwơmàng ndai mờ gùng che jun yal tơnggĭt jơnau, pơn jăt tai pờ ală jơnau yal mờ jơnau sồr ờ ngan bè gam lơh broă bè ờs, mpồl ling 2 sư đoàn ndơ̆p ndơr ntrờn làm bă tiah rê tus đah Jum Tây Nguyên. Sư đoàn 968 rơ̆p tơngguh tai cuh bơh ngài, phàu dờng, jun phan sa gar phàu, gar mền gar nắt lơh anih tam lơh mờ phàu mờ anih sơlàng ờ ngan. Ồng Nguyễn Hữu Mai, đơng lam cíñ trị mpồl ling dềt 4, mpồl ling dờng di mơ 29, sư đoàn 968, yal: “Tŭ hơ̆, kơnòl broă bơh sư đoàn 968 là tam lơh Gia Lai, Kon Tum. He ai cau ling in lòt gùng, kung geh anih ndơ̆p, anih mpờl, anih ndơ̆p ndơr, anih kung ờ ndơ̆p mpồn sơl nàng bol sò tơm in gĭt, bol sò tơm tồn là tam lơh tàm hơ̆ den tàng tơrgùm mŭt jun ling rê”.

Bal mờ bơta chài lơh pơrlồm bol sò tơm, bơta pơgồp bal tam lơh mhar, tam lơh nisơna, tam lơh ai bol sò tơm in ờ thàn wơl tê kung geh lơh jăt jơh sơl tàm Tam lơh Tây Nguyên. Jăt Trung tướng Đoàn Sinh Hưởng, Cau khin cha jak chài mpồl phàu crong làng bol, lài do Đơng lam Ling tiah 4, tŭ tus bal tam lơh Tây Nguyên, tơngai sò tơm Buôn Ma Thuột, mpồl ling klàng he rơndăp mpồl sò tơm tàm 3 đah mờ 5 gùng sò tơm: “2 jiơ drim ngai 10 nhai 03, rơndeh sơtăng geh lik lòt tam lơh, geh ală gơl gùng bol hi pal òt chi lài nàng rơndeh sơntăng in tơn gơgơs gùng lòt, tài bơh ờ gơtùi lơh gùng lài. Di 5 jiơ nggùl drim den rơndeh sơtăng neh tus anih. Do là gùng tam lơh cok jrô tơn tàm tiah lam lơh geh 1 mpồl dềt bơtơl tai, 1 mpồl 1 ling lơh gùng, 1 mpồl dờng ling rơndeh sơtăng mờ 1 mpồl dờng K63 bè hơ̆ do là gùng cok jrô tàm bơrlŭ bal tam lơh bơh đah măt tơngai mŭt cok jrô tơn tàm sư ƀộ 43. Do là broă tam lơh mờ tơnơ̆ do ồng Hoàng Minh Thảo đơs là do là broă tam lơh lì bơkàu tàm dơlam cau sò tơm”.

Tàm dơ̆ tam lơh Tây Nguyên, Ƀộ Cíñ trị lơh nền rwah đah Jum Tây Nguyên bal mờ Buôn Ma Thuột là jơnau kờñ sò tơm tờm neh lơh gơlik geh bơta pràn nisơna jơh gơ wèt mờ ling Ngụy Sài Gòn. Ală cau jòi sền jơnau ndơ̆p ndơr CIA tàm tiah đah Jum ờ gơtùi dòn là cau ling he pờ dơ̆ tam lơh Tây Nguyên bơh dơ̆ tam lơh bơh sơnrờp Buôn Ma Thuột. Bol he geh tơn dùl dơ̆ tam lơh pơrlồm cau sò tơm, pơrlồm cau sò tơm bơh mpồl ling, pơrlồm cau sò tơm bơh jơnau yal, pơrlồm cau sò tơm bơh lam lơh ală broă lơh, pơrlồm cau sò tơm bơh ling lòt gùng lam mpồl tờm pràn ngan bol he dê bơh đah Tô Tây Nguyên mŭt tàm tiah đah Jum Tây Nguyên mờ lơh pơrlồm cau sò tơm mờ tàm broă lơh rơcăng tiah tam lơh tơn, rơcăng ai dơ̆ sò tơm Buôn Ma Thuột in. Trung tướng Nguyễn Thanh Tuấn, lài do là Lam bồ Kụk Mblàng yal bơto pơlam, Tổng Kụk Cíñ trị Mpồl ling klàng Làng bol Việt Nam, pà gĭt: “Mờ bol he, tàm broă rơcăng jŏ jòng lơh tờm Tây Nguyên rơ̆p tơngklàs geh tiah đah Jum, tơrgùm dùl Dà lơgar. Den tàng bè hơ̆, Tam lơh Tây Nguyên pha lin, Buôn Ma Thuột lơh gơtùi lơh gơlik bơta pràn jak ngan tàm tiah tam lơh. Bơta kwơmàng sơlơ nisơna nđờ, cau sò tơm sơlơ ngòt rơngơ̆t sơlơ mprơm nùs kàr hơ̆ sơl. Ngan bơta nisơna hơ̆ neh lơh tơn jơh jơnau kơ̆p kờñ nùs nhơm bơh dồ bơnah uă ngan ling Ngụy Sài Gòn mờ mpồl lơh broă jơng tê bol sò tơm dê. Pha lin Tây Nguyên lơh geh bơta nàng bol he koh gơl kwơmàng tàm tiah đah Jum Việt Nam, sơnđờm ai dơ̆ Ntàu tam lơh dờng mờ sò tơm in”.

Bơta chài lơh pơrlồm cau sò tơm tàm tam lơh Tây Nguyên là dùl cồng nha pơnrơ dờng ngan, pơgồp bơnah tàm tam lơh pha lin bal bơh dơ̆ Ntàu tam lơh dờng mờ sò tơm kàl prang nam 1975. Bơta bơceh lơh tàm bơta pơgồp bal tam lơh lơh pơrlồm cau sò tơm, bơta pơgồp bal bơnĕ bơnài đah ală mpồl cau, mờ jơh nùs lơh ngan tơngklàs tiah đah Jum neh ai Tam lơh Tây Nguyên gơ lòt mŭt tàm jơnau kah yau bè dùl cồng nha lơh geh bơh dơ̆ tam lơh pơnrơ dờng ngan dê.