Jat jơnau yal bơh Ƀộ Priă jền dê, bơta lơh sa- mpồl bơtiàn 2 nhai lơh geh uă cồng nha niam ngan, niam rlau mờ nhai lài mờ dùl tŭ bal mờ nam lài; làng bol, mpồl lơh sa kă bro, cau bơcri priă tàm lơgar mờ lơgar ndai, ală jơnau sồr priă jền, bơyai lơh rơndăp tăp sèng pin dờn ală lơgar dê... gơguh bơta pin dờn tàm bơta kơ̆p kơnờm bơh rài lơh sa dê. Rề dia Dà lơgar lơh geh 25,4% jơnau kờp dŭ lài, gơguh 25,7% pơndrờm dùl tŭ bal mờ nam lài. Priă lơh geh tăc mờ blơi phan bơh lơgar ndai 2 nhai gơguh 12% pơndrờm dùl tŭ bal mờ nam lài.

Tàm pơrjum, ală kwang bàng Cíñ phủ neh tă pơgồp jơnau cribơyai nàng kờñ sền wơl bè bơta lơh sa- mpồl bơtiàn nhai 2 mờ 2 nhai; ală broă lơh jơnau kờñ Dà lơgar; bơta ai priă bơcri Dà lơgar. Thủ tướng sồr ală cau ala mat đơs ală bơta tờm đơng lam sồr lơh, đơng lam tàm tơngai tus nàng nam 2025 in pal gơguh ết ngan rlau jơh 8%, pơgồp bơnah kwơ màng lơh jat tus geh Broă rơndăp lơh bơtàu tơnguh lơh sa mpồl bơtiàn 5 nam bơh nam 2021-2025, lơh geh bơta ƀuơn, bơta pràn, lơh geh bơnàng jă, lơh geh nùs nhơm pa nàng Dà lơgar in cơnđoà kơ̆ mut tàm rài pa, rài brồ să, bơt bơtàu Dà lơgar pas pràn, niam jak, sơlơ bơtàu tơnguh tai, làng bol hờm ram, chờ hờp.