Đơs tàm tìp măt cribơyai, Thủ tướng ồng Phạm Minh Chính đơs niam ngan bơta tam pà song dơ pă, ală jơnau kơlôi sơnơng bơta kơ̆p kờñ, nùs nhơm bơh ală mpồl lơh sa kă bro lơgar Hàn Quốc dê, tơnggŏ bơta gĭt wă, pin dờn bal mờ gơ̆p.

Thủ tướng kơ̆p kờñ ală mpồl lơh sa kă bro lơgar Hàn Quốc neh lơh niam rao mơya sơlơ pal lơh niam rlau tai, bơto pơlam ai Việt Nam in bơtàu tơngguh mhar mơya kơ̆ kơl jăp bè ală bơyô neh lơh tàm dà lơgar ală bơyô, bơ̆t bơtàu, tă pơgồp jơnau đơs bè adăt boh lam nàng gơ in ờ kal ke. Mơkung pơn jăt tai rề ơnàng bơcri priă kă bro tàm Việt Nam mờ sền Việt Nam là anih tờm lơh gơlik phan, bơcri priă, dong Việt Nam tus bal jrô rlau tàm ală drà kă bro gùt plai ù, lơh rơ̆ ru drà kă bro, lơh rơ̆ ru phan bơna; pơgồp bơnah tàm jàu măy mŏk ai Việt Nam in; pơgồp bơnah bơto mpồl cau lơh broă jak chài ngan, bơto ndang, bơsram tàp ndang, mơkung tơngguh uă bơta jak tàm broă lơh, pơgồp bơnah ătbồ broă ngăc ngar, lơh tam gơl pa mpồl lơh broă lơh bè lơi gơ in dipal mờ gùng dà dunia dê mờ bơh Việt Nam dê. Is ồn là bơcri tàm lơh sa mờ măy mŏk niam chài, lơh sa mờ măy mŏk lơh rài bồ tơngoh, tam gơl pa bơceh lơh, măy mŏk siñ họk, măy mŏk tơlir, măy mŏk sồ, bồ tơngoh jak kòn bơnus lơh, ƀán zẫn.