Tàm dơ̆ cri bơyai, Thủ tướng Cíñ phủ ồng Phạm Minh Chính đơs sùm dơ̆ tus còp bơh Thủ tướng lơgar Kyrgyzstan là bơta ai tơngŏ kwơ màng, pờ geh tơngai lơh broă pa ai bơta git gơ̆p lơh bơyô bal ờs mờng đah lơgar Việt Nam mờ lơgar Kyrgyzstan dê, wèt tus tơnguh bơta git gơ̆p tus Tam klăc bal tơl ală bơta.

Bàr Thủ tướng đơs sùm tus mờ bơta kwơ màng bơh broă geh sùm tìp bal ală kấp, tàm hơ̆ uă ngan là kấp dờng, tàm jơh ală gah broă, kung bè đah ală Ƀộ, gah lơh broă, ală tiah, tàm hơ̆ geh broă tìp bal đah bàr lơgar tàm ală dơ̆ pơrjum cri bơyai, pơrjum ală lơgar, uă ngan là Liên hợp quốk; wèt tus crơng gơs ală gah tàm pơgờl bal tơn nàng lơh pràn cồng nha ală jơnau ring bal kấp dờng neh lơh geh. Thủ tướng Cíñ phủ ồng Phạm Minh Chính đơs nền, lơgar Việt Nam tŭ lơi kung rơcang lơh anih tơrbŏ nàng lơgar Kyrgyzstan tơnguh lơh broă bal mờ mpồl ASEAN, kơ̆p kờñ lơgar Kyrgyzstan ngui gơnoar bal mờ tơrbŏ lơgar Việt Nam mờ tiah tàm gùl câu Á dê; sồr lơgar Kyrgyzstan kờñ bal mờ nùs nhơm bơh lơgar Viêt5 Nam mờ mpồl ASEAN dê tàm bơta Dà lềng đah măt tơngai lik.