Di dơ̆ tơngkah kir sơnrai 94 nam Ngai tơngơs Mpồl Ơruh pơnu Kộng sản Hồ Chí Minh Dà lơgar (26/3/1931 – 26/3/2025), mang ngai 23/03, tàm Hà Nội, Thủ tướng Cíñ phủ ồng Phạm Minh Chính tus bal dơ̆ jàu khà jờng cau kơnòm să Việt Nam pơn rơ jak nam 2024, mờ tơngume “Gơnoar broă dờng màng” bơh Đoàn Ơruh pơnu Kộng sản Hồ Chí Minh Dà lơgar, Kes priă dong kờl cau pràn jak kơnòm să Việt Nam, Anih sơñio rùp Việt Nam pơgồp bal bơyai lơh.

Nam 2024, Mpồl bơyai lơh Khà jờng neh dờp geh 159 sră nggal yal tơngĭt bơh 55 mpồl lơh broă tàm jơh gùt lơgar dê. Mpồl duh broă Khà jờng neh jòi gŏ geh 10 nă cau kơnòm să Việt Nam pơn rơ jak mờ 8 nă cau kơnòm să Việt Nam gơn kơnờm bơtàu tơnguh geh cồng nha pơn rơ mờ jak ngan tàm ală gah: Bơsram sră; Kơlôi sơnơng jak chài- bơceh lơh; Lơh broă lơh sa; kă bro mờ sơnđờm mut lơh broă; Sền gàr Dà lơgar; lơngăp lơngai rơndăp tăp sèng; Tàp pràn să jan; broă lơh mpồl bơtiàn; Niam chài đơs crih tam ya; Atbồ sră nggal gơnoar atbồ Dà lơgar neh geh jờng rơ. Thủ tướng ồng Phạm Minh Chính chờ hờp tus bal dơ̆ jờng rơ cau jak chài kơnòm să jak ngan- ală cau tờm tơnơ̆ do bơh Dà lơgar dê, mờ gơnoar broă là mpồl lam lài, mpồl lòt lài mờ nùs nhơm “Rơnàng kơnòm să Việt Nam pơnyờ să, kơ̆ nùs pin dờn jat Đảng” lam Dà lơgar cơnđoà kơ̆ mut tàm rài pa. Thủ tướng kơ̆p kờñ Ơruh pơnu Việt Nam pal tơrgùm lơh jat ring bal, gơguh jak mpồl bơtiàn, gàr tơl niam rài kis mpồl bơtiàn, bơtàu tơnguh rài kis làng bol, lơh ngan ngồn ală gùng dà broă lơh bơh Đảng, Dà lơgar dê bè gàr tơl niam rài kis mpồl bơtiàn, ngan là tus bal ring bal bè bơto bơtê, lơh sơnơm tàm tơl kơnhoàl ù tiah Dà lơgar dê, tus mờ mờ tơl mpồl bơtiàn, tơl hìu bơnhă mờ tơl nă làng bol in, ngan là tàm tiah kơh bơnơm, tiah sar lơgar ngài, tiah nhàr lơgar, bồt bơlào dà lềng mờ nùs nhơm “ờ gŏ di lời dồ nă cau lơi gơtìp lời wơl bơh ngkời”.