Tàm pơrjum bal, Thủ tướng ồng Phạm Minh Chính đơs sùm bơta kwơ màng bơh broă lơh is, lơh pràn is, lơh tờm is kwơ màng gơwèt mờ tơl Dà lơgar, tơl mpồl tàm dunia, tàm hơ̆ geh lơgar Việt Nam mờ Asean.

Jat Thủ tướng ồng Phạm Minh Chính, broă do geh tơngŏ tàm bơta ring bal tàm bơta gĭt gơ̆p cribơyai broă mờ lơgar ndai jat tàm ală bơta adat boh lam nàng kờñ lơh geh tiah ƀuơn ngan ai bơtàu tơnguh in; bơta bơtàu tơnguh bè lơh sa nàng ờ gơtìp gơ tơn rŭc wơl; sền gàr Dà lơgar, lơngăp lơngai geh lơh kơ̆ kơl jăp di pal mờ bơta geh ngan; gàr niam rài kis mpồl bơtiàn nàng ờ gŏ di lời dô nă cau lơi gơtìp lời wơl bơh ngkời, ờ jàu phi ring bal mpồl bơtiàn nàng bơtàu tơnguh lơh sa mìng dùl tơngai ing gời lơm; sền gàr, ngui niam bơta niam chài, bơhiàn niam chài. Is ồn gơwèt mờ broă lơh jat niam gơnoar tờm bơh Asean dê Thủ tướng ồng Phạm Minh Chính đơs sùm, Asean pal tơngŏ gơnoar tờm tàm mpồl tàm dơlam is, bè ală broă geh gơrềng tus tam lơh, geh gơrềng tus kal ke, geh gơrềng tus ală broă dunia tŭ do dê. Jat Thủ tướng ồng Phạm Minh Chính, lài ngan tơl lơgar geh dùl broă lơh, lơh broă mờ cèng wơl cồng nha ai ring lơngai lơh broă bal mờ bơtàu tơnguh tŭ do tàm dunia in; dơ̆ 2 là Asean pal tơrgùm jơh ală cồng nha bơh ală lơgar tàm Asean dê nàng lơh gơ kờñ lơh geh bơta gơn kơnờm ai ală tiah ndai, ai ală lơgar tàm dunia in.