Thủ tướng đơs, sơrlèt 48 nam bơ̆t bơtàu, bơtàu tơngguh, Hìu bơsram kơlôi sơnơng Sền gàr dà lơgar neh lơh geh uă broă, cồng nha kwơmàng, bè: lơh niam broă lơh tă pơgồp jơnau đơs kwơmàng bè broă ling klàng, sền gàr dà lơgar, bơ̆t bơtàu Mpồl ling klàng.

Bè kơnòl broă tờm tàm tơngai tus, Thủ tướng sồr Hìu bơsram kơlôi sơnơng Sền gàr dà lơgar jăt sền gĭt nền ngan, gĭt di broă, gĭt di anih, di tŭ broă dunia, kơnhoàl ù tiah do nàng tă pơgồp jơnau đơs ai Đảng Dà lơgar in bè broă rơndăp lơh cau lơi là cau lơh broă bal, cau lơi là cau pal kơrhia, nàng ờ gơtìp rơmơ̆p ndơl bè broă rơndăp lơh; Lơh niam broă lơh tă pơgồp jơnau đơs kwơmàng; sền gròi broă lơh tơn jơh, kơlôi sơnơng, lơh sir jơnau cribơyai tàm sră pơ àr, jak chài, măy mŏk bè broă ling klàng, sền gàr dà lơgar; Tơngguh uă cồng nha kơlôi sơnơng, yal lài broă digơlan gơlik geh, nàng geh gùng dà, broă lơh jŏ jòng bơtàu tơngguh dà lơgar, mơya pal gàr kơnhăp lơngăp lơngai is, rơcăng lài is. Mơkung lơh pràn kơlôi sơnơng, dan ală broă lơh bơtàu tơngguh lơh sa- mpồl bơtiàn gơ jăt bal mờ gàr niam sền gàr dà lơgar, lơngăp lơngai mờ lơh broă mờ lơgar ndai.