Tàm nùs nhơm kah kơlôi, ngoh rơngăc, Tổng Ƀí thư ồng Tô Lâm neh chu nàng, kah kơlôi tus Củ tịc Hồ Chí Minh, kwang đơng lam jăk chài kờñ gơboh jơi bơtiàn lơgar Việt Nam dê.

Tổng Ƀí thư ồng Tô Lâm ngoh rơngăc cih ală jơnau kah wơl: “Tus tàm do, he sơlơ wă rơlao tài bè lơi Củ tịc Hồ Chí Minh ờ mìng là nùs nhơm pơnyờ să jơi bơtiàn lơgar Việt Nam dê mờ gam geh gùt dunia ki ngàm ngan. Tus tàm do, he gơlơh bè rê tàm hìu tờm, đềt mềr, gơboh gơbài, geh uă nùs nhơm niam mờ gŏ Wa kung gam tàm tiah do”. Boh bơr đềt mềr mờ kwang bàng, cau lơh broă tàm Tiah tềl kah yau, Tổng Ƀí thư tơlik nùs nhơm, geh tus còp anih Wa ơm mờ lơh broă tŭ gam kis gơlơh đềt mềr mờ ram mhŭ ngan, ală phan Wa ngui mờng mờ niam ngan, ai tơngŏ rùp rài cau đơng lam dờng. Đơs niam kwang bàng cau lơh broă tàm Tiah tềl kah yau neh lơh broă geh kơnòl tàm broă prăp gàr mờ ngui ală bơta kwơ phan lời wơl tàm Tiah tềl kah yau dong kờl uă cau năc bơh ală lơgar mờ tàm lơgar tŭ tus sền sùm geh nùs nhơm Wa Hồ kung gam tàm do mờ he.