Cribơyai Lơh sa câu Á- Thái Bình Dương (APEC) nam 2027 mờ tơngume “tàm tơrbŏ bal, bơt bơtàu ală rài lơh sa glòm jơh mờ pràn is” rơ̆p là tềl lời wơl kwơ màng, tơngŏ gơnoar broă bơh lơgar Việt Nam dê tàm tiah do. Broă wă rò gĭt nđờ rơbô nă cau ala mat, kwang đơng lam bồ kấp dờng mờ cau lơh sa kă bro bơh 21 rài lơh sa tàm mpồl APEC dong Phú Quốc gơs tiah tờm bơh ală dơ̆ kĭ hơ kă bro phan, bơt bơtàu bơta gĭt gơ̆p lơh broă bal đah ală lơgar dờng pràn lơh sa.

Tơnơ̆ tŭ iăt ală jơnau đơs, Thủ tướng sồr càr Kiên Giang pal tàm pơn ring tŭ tơngai, broă lơh, nùs nhơm là pal sền gĭt loh bè ală bơta, cau bơh ală rơndăp broă lơh dê là drơng ai APEC in. Thủ tướng jàu kơnòl broă ai Phó Thủ tướng ồng Bùi Thanh Sơn in drơng kơnòl broă tơngume mờ broă lơh bơyai lơh pơrjum; Phó Thủ tướng ồng Nguyễn Chí Dũng drơng kơnòl kơlôi sơnơng bơcri priă lơh phan bơna bơt bơtàu; Phó Thủ tướng ồng Trần Hồng Hà drơng kơnòl broă geh gơrềng tus tam gơl jơnau kờñ ngui ù brê, ù lơh kòi.