Mho mang ngai 5/03, Ƀí thư Đảng ủy Cíñ phủ, Thủ tướng Cíñ phủ ồng Phạm Minh Chính đơng lam pơrjum bơh Đảng ủy Cíñ phủ dê lam lơh kơlôi sơnơng, sền sơwì, sồr dan broă tơmut bal bàr pe mpồl lơh broă kấp càr, ờ lơh kấp kơnhoàl, tơmut bal bàr pe mpồl lơh broă kấp sàh, jat Jơnau đơs pơndŭt sồ 127 bơh Ƀộ Cíñ trị, Mpồl Đơng lam Đảng Dà lơgar dê bè broă lam lơh kơlôi sơnơng, sồr dan pơn jat tai rơndăp tăp sèng mpồl lơh broă bơh ală anih lơh broă cíñ trị dê. Tơnơ̆ tŭ iăt jơnau rcang cih Ală jơnau neh lơh nền mờ Đảng ủy cribơyai bè broă lơh tơmut bal bàr pe mpồl lơh broă sră nggal gơnoar atbồ kấp càr, kấp sàh, jơnau đơs pơndŭt Pơrjum, Thủ tướng ồng Phạm Minh Chính đơs sùm, broă tơmut bal bàr pe mpồl lơh broă kấp càr, ờ lơh kấp kơnhoàl, tơmut bal bàr pe mpồl lơh broă kấp sàh pal jat tàm Jơnau pơndŭt sồ 127 bơh Ƀộ Cíñ trị, Mpồl Đơng lam Đảng Dà lơgar dê. Bè hơ̆, rơndăp gơnoar atbồ ală ƀòn lơgar tus do mìng gam 2 kấp là kấp càr mờ kấp sàh.

Thủ tướng Cíñ phủ tơngkah broă tơmut bal ală mpồl lơh broă sră nggal gơnoar atbồ kấp càr mờ kấp sàh ờ mìng gàr niam ală jơnau pal jat, broă jàu, jơnau sồr bè bă ù, khà kờp làng bol lơm mờ gam pal gàr niam bơta krơi is bè ù tiah, lơh sa, mpồl bơtiàn, jơnau kah yau, niam chài mờ geh bơta tàm dong kờl bal tai.