Thủ tướng Cíñ phủ ồng Phạm Minh Chính jờng rơ uă ngan, cih dờp ală jơnau đơs jơh nùs, geh kơnòl, bồ tơngoh kơlôi sơnơng bơh ală Kwang bàng Mpồl lơh kơnòl broă sùm dê; sồr Ƀộ Broă dơlam is iăt kơno pơn jat tai lơh sir Ală jơnau neh lơh nền nàng dan jơnau đơs Ƀộ Cíñ trị dê.

Thủ tướng đơs sùm, broă rơndăp tăp sèng mpồl lơh broă sră nggal gơnoar atbồ, pơgồp bal mờ rơndăp tăp sèng mpồl lơh broă pal tơrmù dipal, niam, pràn, lơh broă jat bơta chài, gơtùi lơh broă mờ lơh broă geh cồng nha geh Đảng, Dà lơgar tơrgùm lơh jat mờ geh dồ nùs bal uă. Broă rơndăp tăp sèng mpồl lơh broă sră nggal gơnoar atbồ nàng kờñ lơh geh ù tiah bơtàu tơnguh; ngui niam bơta ƀuơn bơta pràn, tŭ tơngai niam tàm pơrlòng bơh ală tiah dê di pal mờ ală bơta bơtàu tơnguh tŭ do; yờ tơnguh uă bơta lơh tờm is, lơh is, pràn is bơh ală kấp gơnoar atbồ ală tiah dê; is ồn nàng gơnoar atbồ in rềp mờ làng bol rlau tai, lơh broă rềp làng bol rlau tai, bơsong broă lơh bơh làng bol dê mhar rlau, ƀuơn rlau; cèng wơl bơta hờn chờ ram mhŭ ai làng bol in uă rlau tai.