Tàm pơrjum ală cau ala mat tơrgùm cribơyai song dơ pă bè bàr pe tơngume geh gơrềng tus broă jàu lơh hìu ơm mpồl bơtiàn jàu ai ală tiah in; gùng dà, broă lơh kòl yan pal geh bơsong; broă lơh hòi jà tă pơgồp bal priă jền; mòn lơh, rùp hìu ơm mpồl bơtiàn, sră nggal gơnoar atbồ... 

Đơs tàm pơrjum, Thủ tướng ồng Phạm Minh Chính pà gĭt, gùng dà broă lơh bơh Đảng, Dà lơgar dê ai gĭt loh ngan là bơtàu tơnguh mhar mờ kơ̆ kơl jăp jŏ jòng, ờ jàu phi bơta gơguh jak, ring bal, gàr niam rài kis mpồl bơtiàn nàng ntoăt jat gơguh lơh sa mìng gơ lơm. Thủ tướng ai gĭt loh, pal lơh lài hìu ơm mpồl bơtiàn den hơ̆ sồng tus hìu ơm kă bro phan. Hìu ơm mpồl bơtiàn pal geh bơcri priă lơh dồ ròt bal ală phan bơna bơt bơtàu gùng lòt, lơh sơnơm, bơto bơtê, tàp pràn să jan, mpồl bơtiàn, tiah ơm kis... bè hìu ơm kă bro phan, mơya mìng krơi là Dà lơgar geh broă lơh dong kờl. Thủ tướng neh sơñio loh bàr pe broă lơh neh mờ gam geh lam lơh bè tơnggơs kes priă hìu ơm Dà lơgar; ai priă càn 140 rơbô tơmàn đong ai hìu ơm mpồl bơtiàn in.