Broă lơh gơ hòi gơ jà gĭt nđờ rơbô nă kơnòm bơsram, cau bơsram dờng, cau pơgru, cau bơcri priă, cau gĭt wă jrô broă lơh. Thủ tướng tơngŏ bơta pơn yờ să tŭ geh 42 rơbô rơndăp broă lơh sơnđờm mut lơh broă geh bơh kơnòm bơsram, cau bơsram dờng, uă rơndăp broă lơh neh gơ gơs mpồl lơh sa kă bro geh cồng nha, ngui măi mok tàm broă lơh sa suơn sre sàng goh, lơh sơnơm, tam gơl sồ.

Thủ tướng đơs nền, mpồl cau sơnđờm mut lơh broă pal geh broă lơh kwơ màng jŏ tơngai, sồr pal lơh sir gùng dà broă lơh, is ồn bè priă jền, ngui phan bồ tơngoh jak lơh geh; tơnguh uă kes priă dong kờl cau bơsram dờng bơh bơta pràn mpồl bơtiàn dê lơh bal. Thủ tướng kơ̆p kờñ rơnàng kơnòm să – mpồl cau sơnđờm mut lơh broă tàm rài sồ- rơ̆p geh gơnoar broă tờm tàm bơtàu tơnguh jak chài măi mok, tam gơl pa bơceh lơh mờ tam gơl sồ Dà lơgar, pơgồp bơnah ai Việt Nam bơtàu tơnguh mhar mờ kơ̆ kơl jăp.