Rơndăp broă lơh bơcri priă lơh Ƀlàng rơndeh par Ală lơgar Long Thành, càr Đồng Nai tơngai dơ̆ 1 kờp jơh priă bơcri lơh rlau 109 rơbô tơmàn đong, kờp dŭ lơh sir tàm nam 2026. Lơh jat jơnau sồr bơh Thủ tướng dê, tơngai pa do, Ƀộ bơt bơtàu mờ ală cau bơcri priă lơh neh lam lơh ală broă lơh nàng tơn lơyah tŭ tơngai lơh rơndăp broă lơh, jat hơ̆ sền bal rơ̆p lơh sir rơndăp broă lơh tàm nam do.

Lơh broă mờ ală Ƀộ, gah broă, ală tiah, cau tờm bơcri priă lơh, cau tờm lơh broă, Thủ tướng ồng Phạm Minh Chính đơs sùm, Rơndăp broă lơh Ƀlàng rơndeh par Ală lơgar Long Thành geh gơtha kwơ màng uă ngan. Tơnơ̆ ală lơh ngan, jơh nùs lơh ngan, rùp hìn bơh Ƀlàng rơndeh par pa ngan neh gŏ. Jơnau sồr pal lơh ngan tus jơh ngai 31/12/2025 sền bal lơh sir broă rơndăp lơh nàng rò ală dơ̆ par sơnrờp, Thủ tướng Cíñ phủ ai gĭt loh ală rơndăp broă lơh bơnah kung ờ tam gơl jơnau kờñ; ală Ƀộ, gah broă, ală ƀòn lơgar, cau tờm lơh broă pal pơnđơl pràn lơh ngan, tơrgùm sồr lơh mhar broă mut lơh.