Ồng Nguyễn An Vinh, Ƀí thư Tỉñ ủy càr Dăk Lăk lài do, là cau neh geh rơlao 50 nam lơh broă tàm càr Dăk Lăk đơs nền, gùng dà broă tơrgùm bal bàr càr là dùl broă lơh di pal mờ mùl màl mờ di mờ jơnau kơ̆p kờñ bơh làng bol dê: “Añ gŏ do là broă lơh di ngan mờ nùs nhơm làng bol bơh bàr càr dê. Ală kwang bàng neh geh tŭ lơh broă tàm rài tam lơh bè añ ndrờm wă loh làng ngan bơta git gơ̆p đềt mềr, nùs nhơm đah càr Dăk Lăk mờ càr Phú Yên dê. Tàm rài tam lơh mờ ling lơgar Mỹ sò tơm, càr Phú Yên neh gơs anih dong kờl kơl jăp, ai phan sa, boh, phe, mờ phan ngui nàng càr Dăk Lăk in. Sơlơ̆u wơl, càr Dăk Lăk kung là tiah kơl dìng kwơ màng càr Phú Yên dê bơh tiah kơh bơnơm. Bơta git gơ̆p do đềt mềr ngan tus mờ bơta làng bol neh geh jơnau đơs: “Dà dờng Ba hòr tus Đà Rằng/Cau gơboh Dăk Lăk ờ ndrờm mờ Phú Yên”.

Tàm nùs nhơm bơh ală cau ling neh geh tŭ tus tam lơh tài bơta krơi is jơi bơtiàn, bơta git gơ̆p đah bàr càr ờ mìng là broă tơrbŏ bal ù tiah, mờ gam là nùs nhơm bơh cau ling tàm mpồl bal. Ồng Bùi Văn Khiêm, cau ling yau neh geh tŭ tus bal tam lơh tơnklàs càr Phú Yên tàm nam 1975, tŭ do gam kis tàm càr Dăk Lăk ờ gơtùi pồn nùs nhơm ngoh rơngăc mờ đơs: “Añ neh geh tŭ đơs nhơl gời mờ oh mi là añ kờñ càr Dăk Lăk mŭt bal mờ càr Phú Yên. Mơya jơnau đơs nhơl hơ̆ neh gơs mùl màl. Añ kah tàm rài tam lơh, bơh Buôn Ma Thuột añ mù tus càr Phú Yên, lòt gùng brê hơ̆ sồng lik tus tàm dà lềng mờ añ kơ̆p kờñ tơnơ̆ do geh gùng  rơndeh lòt mhar lòt bal jăt gah dà dờng Ba mù tus den chờ hờp ngan. tŭ do he tơrgùm bal bàr càr Dăk Lăk mờ Phú Yên den niam bơnĕ ngan mờ jơnau kơ̆p kờñ añ dê neh di mùl màl ngan”.

Dùl cơng tàng rài lài do ndai, hơ̆ là ồng Tô Tấn Tài, gam sơnđan là ồng bèp H’ Oanh, Ƀí thư Thị ủy Buôn Ma Thuột lài do, ồng bơh càr Phú Yên tus ơm kis, mơya neh ai jơh rài kis ồng dê tàm broă lơh kăc màng tàm càr Dăk Lăk. Ồng neh geh tŭ at uă ngan gơnoar broă kwơ màng tơnơ̆ mờ tŭ ngai dà lơgar tơrgùm dùl mờ là dùl tàm ală kwang bàng lơh bơnàng jă lài ngan ai mpồl kăc màng tàm tiah Lăk in bơh nam 1959. 

Yal bè nùs nhơm bè jơnau lơh nền tơrgùm bal bàr càr dê, ồng tơlik nùs nhơm chờ hờp ngan, mơya kung gam sồr pal kah sền kwơ tus mờ broă tam klăc bal tàm dơlam is, mpồl lơh broă: “Kơlôi rơcang là lơh bè lơi tàm mpồl dơlam is geh niam, làng bol geh niam, tam klăc bal mùl màl. Tài añ kung gam kơlôi rơcang, lài do he kung neh geh tŭ tam cah hơ̆ sồng tơrgùm bal tai ờ uă càr Bình Trị Thiên, hơ̆ sồng Quảng Nam Đà Nẵng, Phú Yên Khánh Hoà. Mơya tŭ hơ̆ di gơlan là tŭ ờ hềt di pal, dơ̆ bàr tai là broă rơcang nùs nhơm ai làng bol in ờ hềt niam, den tàng lời gơtìp bơta ală càr geh tơrgùm bal ndrờm geh nùs nhơm ờ niam. Tŭ do pin dờn tàm bơta pa mờ nùs nhơm bơh Đảng đơng lam nền nòn, lơh niam broă nùs nhơm ai mpồl dơlam is in, bơh tŭ hơ̆ lơh geh uă bơta niam tàm làng bol den gŏ kung niam sơl”.

Mò Niê Thanh Mai, Củ tịc Mpồl Văn họk Nghệ thuật càr Dăk Lăk đơs, geh bèp là là cau bơh càr Phú Yên, mè là cau tàm càr Dăk Lăk, kơlôi sơnơng nền nòn rơlao tàm bơta niam chài dê. Mò Niê Thanh Mai đơs là, càr Phú Yên geh bơta niam chài dà lềng, càr Dăk Lăk geh uă bơta krơi is bơh ală jơi bơtiàn ờ gal cau Tây Nguyên dê. Di lah lơh niam, do rơ̆p là dùl bơta niam chài uă bơta, lơh geh nùs nhơm niam tàm broă bơceh jơnau đơs crih, bơtàu tơnguh lòt nhơl mờ tìp bal bơta niam chài. “Bol añ kơ̆p kờñ ngan, bol añ gơtùi tàm bơtơl bal mờ tam pà bal ală broă lơh mờng chài kung bè uă rơlao jơnau bơceh bè bàr gah. Di lah bè geh ală broă rơndăp lơh mờ broă lơh jŏ jòng mùl màl den ală broă lơh rơ̆p geh uă bơta ngan tàm tơngai tus”.

Bơh nùs nhơm làng bol dê kung ai tơngŏ geh bơta ring nùs bal sơl. Ồng Nguyễn Song Thoại, kis tàm mpồl ƀòn 8, ƀòn drà dềt Quảng Phú, kơnhoàl Cư̆ Mgar, càr Dăk Lăk đơs là: “Tŭ do càr Dăk Lăk tơrgùm bal mờ càr Phú Yên là di pal, geh bơnơn, geh dà lềng. Mơya kal ke là bơta niam chài, di lah broă lơh sa tàm tiah lơi kung pal geh lơh lơm, bè ờs ngan”.

Broă tơrgùm bal đah càr Dăk Lăk mờ càr Phú Yên ờ mìng là jơnau lơh nền sră nggal, mờ gam là broă rê wơl bơh dùl nùs nhơm kờñ gơboh bal neh geh tŭ đềt mềr tàm rài tam lơh lài do. Mờ bơta tờm bè ù tiah bơtơl, bơta niam chài geh uă mờ rài lài do đềt mềr, càr Dăk Lăk pa geh kơ̆p kờñ rơ̆p là dùl tiah gơguh lơh sa pa tàm tiah Đah jum tàm gờl lơgar mờ Tây Nguyên dê. bơdìh hơ̆ tai, bè ală jơnau neh geh đơs, bơta tờm là nùs nhơm ring bal tàm dơlam is kwang bàng đơng lam mờ nùs nhơm ring bal bơh làng bol dê tai. Mìng tŭ hơ̆, broă tơrgùm bal hơ̆ sồng mùl màl ngui geh bơta pràn tơrgùm bal, lơh geh dùl bơta pràn bơtàu tơnguh pa, ndrờm bal mờ kơl jăp.