Tàm dơ̆ tus còp mùl màl lơgar Singapore, drim òr (13/03), Tổng Ƀí thư ồng Tô Lâm bal mờ mpồl kwang bàng ala măt kấp dờng lơgar Việt Nam neh geh dơ̆ tus còp mờ lơh broă tàm anih ơhò dà lềng ơm Pansir Panjang-do là dùl tàm ală anih ơhò container pa ngan tiah Đah jum măt tơngai lik câu Á dê nàng sền git broă bơtàu tơnguh phan bơna anih ơhò dà lềng ơm lơgar Singapore dê.

Tàm anih ơhò ơm Pansir Panjang, Tổng Ƀí thư ồng Tô Lâm bal mờ mpồl kwang bàng geh ồng Nelson Quek, Kwang lam bồ dờng Đơng lam tiah đah jum măt tơngai lik câu Á mờ ală kwang đơng lam bồ Tập đoàn PSA Singapore yal tơrgùm bal bè broă bơtàu tơnguh, ală cồng nha neh geh lơh pơnrơ ngan bal mờ gùng dà broă bơtàu tơnguh jŏ jòng tàm tơnơ̆ do bơh Anih ơhò ơm dê. Tổng Ƀí thư ồng Tô Lâm chờ gờm mờ đơs niam ală cồng nha mờ anih ơhò ơm dê mờ pà git nam 2025, lơgar Việt Nam geh kờp jơh priă tăc mờ blơi mờ lơgar bơdìh bơh kă bro phan geh di pơgăp 800 tơmàn dolar Mỹ tàm nam 2024 mờ gam wèt tus jơnau kờñ 1 rơbô tơmàn dolar Mỹ, den tàng gùng pơn diang phan dà lềng bal mờ anih ơhò ơm geh gơnoar kwơ màng ngan tàm broă gàr niam jơnau kờñ kă bro phan lơgar Việt Nam dê. Tàm tơngu me hơ̆, Tổng Ƀí thư kơ̆p kờñ tập đoàn PSA gờñ tus tàm lơgar Việt Nam nàng lơh broă bal bơtàu tơnguh mpồl anih ơhò dà lềng ơm tàm lơgar Việt Nam tài broă mờng chài bơh lơgar Singapore dê tàm gah do geh kwơ màng ngan gơwèt mờ lơgar Việt Nam tàm broă lơh pa ală anih ơhò dà lềng ơm mờ bơtàu tơnguh gah logistic dê.