Drim ngai 11/12, tàm ƀòn dờng Cao Lãnh, Tổng Ƀí thư ồng Tô Lâm lam bồ mpồl lơh broă Dà lơgar đơng lam dơ̆ lơh broă mờ Mpồl duh broă Đảng ƀộ càr Đồng Tháp bè bơta lơh jat Jơnau lơh nền tàm pơrjum tàm Pơrjum dờng dơ̆ 13 bơh Đảng, Jơnau lơh nền tàm pơrjum tàm Pơrjum dờng cau ala mat Đảng ƀộ càr Đồng Tháp dơ̆ 11, tơngai lơh broă bơh nam 2020 - 2025; broă lơh jat Jơnau sồr sồ 35 bơh Ƀộ Cíñ trị bè Pơrjum dờng Đảng ƀộ ală kấp lơh tus Pơrjum dờng cau ala mat gùt lơgar dơ̆ 14 bơh Đảng dê. Đơs sồr lơh tàm dơ̆ lơh broă, tơnơ̆ tŭ iăt jơnau yal mờ jơnau đơs tă pơgồp bơh ala mat ală Ƀộ, ƀan, gah broă, Tổng Ƀí thư ồng Tô Lâm jờng rơ, jờng rơ uă ngan mờ cih dờp bơta lơh ngan mờ pơn đơl pràn lơh ngan, ală cồng nha, cồng nha lơh geh mờ Đảng ƀộ, gơnoar atbồ mờ làng bol càr Đồng Tháp neh lơh geh tàm tơngai pa do.

Đơs ngan nam 2025 là nam bơtàu tơnguh mhar, bơtàu tơnguh pràn, lơh sir ală broă lơh, nàng lơh ngan lơh geh cồng nha uă ngan rlau jơh ală jơnau kờñ, broă jàu bơh broă rơndăp lơh bơtàu tơnguh lơh sa- mpồl bơtiàn 5 nam, tơngai lơh broă bơh nam  2021 - 2025 mờ Jơnau lơh nền tàm pơrjum tàm pơrjum dờng Đảng ƀộ càr Đồng Tháp dơ̆ 11, tơngai lơh broă bơh nam 2020 - 2025, Tổng Ƀí thư sồr, Mpồl duh broă Đảng ƀộ càr Đồng Tháp geh broă bơsong kràñ cê jơh nùs, bơsong jơh nàng lơh jat geh cồng nha kơnòl broă bơtàu tơnguh lơh sa- mpồl bơtiàn nam 2025, tơrgùm lơh ngan lơh geh cồng nha uă ngan rlau jơh ală broă jàu neh geh ai, ngan là ală broă jàu geh gơrềng tus gơguh lơh sa, priă lơh geh bơh làng bol dê.