Tổng Ƀí thư jờng rơ ală cồng nha niam ngan tơnơ̆ pơrjum dơ̆ 1, is ồn là broă ai lơh jat Jơnau lơh nền tàm pơrjum sồ 193 mờ 12 gùng dà lơh tơrlòng lài nàng kờñ lơh jat Jơnau lơh nền tàm pơrjum sồ 57 bơh Ƀộ Cíñ trị dê. Tổng Ƀí thư đơs sùm tam gơl sồ tàm ală anih lơh broă Đảng neh geh gơguh uă ngan, cèng wơl uă bơta kwơ ai làng bol mờ mpồl lơh sa kă bro in, lơh bơnàng jă kwơ màng nàng bơt bơtàu Anih tờm ală jơnau Dà lơgar dê.

Mơya, Tổng Ƀí thư kung sơñio geh ală broă kờñ pal tơrgùm bơsong; mơkung, pal tă bơsong kal ke bè gùng dà, broă lơh mờ gàr niam bơta pràn nàng lơh jat geh cồng nha. Tổng Ƀí thư sồr ai ềt ngan rlau jơh 3% kes priă Dà lơgar nam 2025 ai bơtàu tơnguh jak chài măi mok in, tơnguh tus 2% GDP tàm 5 nam pơn jat tai. Ală Ƀộ gah broă, ală tiah tơrgùm lơh sir phan bơna bơt bơtàu sồ, broă lơh sồ, is ồn là Anih tờm ală jơnau Dà lơgar dê bè lơh sa kă bro, bè ù tiah; pal khin cha rơ wah ai ală phan bơna, ală broă lơh ngui jak chài măi mok, tam gơl pa, tam gơl sồ sơr băc mhar mut lơh broă ngan ngồn.