Tàm dơ̆ wă, Tổng Ƀí thư ồng Tô Lâm đơs nền Việt Nam sùm sền gròi gĭt gơ̆p lơh bơyô mờ lơgar Kyrgyzstan. Tổng Ƀí thư đơs là, bơh rlau 30 nam, gĭt gơ̆p cíñ trị mờ cribơyai broă mờ lơgar ndai geh lơh kơ̆ kơl jăp, lơh broă bal lơh sa- kă bro phan đah 2 lơgar neh geh ală broă bơtàu tơngguh uă ngan, bulah bè hơ̆, gam uă bơta pràn ờ hềt geh lơh mờ bơtàu tơngguh, kơ̆p kờñ tơngguh rlau tai lơh broă bal 2 gah tàm jơh ală broă jăt tàm ală jơnau cribơyai ring bal, hơ pơrgon đah 2 đah ngui geh cồng nha ală bơta ƀươn mờ Jơnau kĭ hơ kă bro phan khăt gơboh đah Việt Nam mờ Mpồl tam klăc Lơh sa câu Á mờ câu Âu dê; 2 lơgar gơtùi lơh jăt niam gơnoar broă tàm tơrbŏ tàm kơnhoàl ù tiah tàm gùl câu Á mờ Asean.

Tơngai tus, 2 nă kwang đơng lam bồ dồ nùs ring bal là, 2 lơgar geh uă bơta pràn chồl tơngguh gĭt gơ̆p lơh broă bal 2 gah tàm bơta bơnĕ bơnài bal bơta kwơ; đơs sùm pal lơh pràn tìp măt tàm kâp dờng, tàm jơh ală gah 2 gah mờ uă gah, Đảng, Quôk hội nàng kờñ tơnguh tai pin dờn cíñ trị; hòi jà lơh ală mpồl lơh broă bal đah ală ƀộ, gah, ƀòn lơgar.