Pơn jăt tai ală broă lơh tàm dơ̆ tus còp kấp dà lơgar tus lơgar Indonesia mờ còp mùl màl Mpồl Gơnoar cih ASEAN, drim òr (10/03) Tổng Ƀí thư ồng Tô Lâm tus mờ geh jơnau đơs tàm dơ̆ tìp măt tơm bơh bơr mpồl lơh sa kă bro kấp dờng di tơnkah 70 nam git gơ̆p cri bơyai broă mờ lơgar ndai đah lơgar Việt Nam mờ lơgar Indonesia mờ tơngu me “Việt Nam mờ Indonesia: Git gơ̆p tam klăc bal tài bơta gơguh jăk mờ pas gơs”.

Đơs tàm dơ̆ cri bơyai, Tổng Ƀí thư ồng Tô Lâm đơs niam ală broă lơh bơcri priă, kă bro phan geh cồng nha đah lơgar Việt Nam mờ lơgar Indonesia tàm tơngai do mờ kơ̆p kờñ pơn jăt tai dờp geh jơnau pin dờn, lơh broă bal, dong kờl bal bơh Cíñ phủ, ală anih lơh broă, mpồl bơtiàn mpồl lơh sa kă bro lơgar Indonesia tàm tơngai tus. Tổng Ƀí thư sồr, ală cau bơcri priă bàr lơgar rơ̆p kơlôi sơnơng, rề ơnàng bơcri priă tàm ală gah, broă lơh bè bơta jăk chài măi mok pa, tam gơl bơceh lơh, kơlôi sơnơng mờ bơtàu tơnguh, bơtàu tơnguh gah lơh sa mờ măi mok cip ƀán zẫn, bơta ngăc ngar kòn bơnus lơh gơs (AI), internet vạn vật (IOT); năng lượng pa (bè hydrogen), năng lượng lơh geh wơl; priă jền, anih lơh broă priă jền, măi mok siñ họk, lơh sơnơm… lơgar Việt Nam ngai sơlơ ai tơngŏ gơnoar pơgồp bal kwơ màng tàm mpồl geh kwơ bơcri priă pa bơh dunia dê, tàm hơ̆ uă ngan là tàm gah điện tử, jăk chài, măi mok pa, tàm gơl pa bơceh lơh, cip ƀán zẫn, lơh sa sồ, kă bro tơlir.