Broă lơh “Tam tìp kơnòm bơsram, cau bơsram dờng Việt Nam mờ Lo ală tŭ tơngai” bơh Ƀộ Cribơyai broă mờ lơgar ndai đơng lam pơgồp bal mờ Tơrgùm ală mpồl lơh bơyô Việt Nam mờ ală anih lơh broă geh gơrềng bơyai lơh di dơ̆ tơngkah kir sơnrai 75 nam lơh gĭt gơ̆p cribơyai broă mờ lơgar ndai Việt Nam mờ Lo mờ Nam tìp măt lơh kwèng niam chài kòn bơnus Việt Nam mờ Lo nam 2025. Tổng Ƀí thư ồng Tô Lam tus bal mờ đơs tàm broă lơh. Broă lơh geh pơgăp 800 nă cau ala măt tus bal, tàm hơ̆ 500 nă cau ala măt Việt Nam mờ 300 nă cau ala măt lơgar Lo. Do là ală rơnàng cau bơsram dờng- ală cau neh să tờm tơn sền gŏ bơta bơtàu tơngguh gĭt gơ̆p Việt Nam mờ Lo dê. Bal mờ hơ̆ là bơta geh măt bal bơh ală ala măt rơnàng kơnòm să- tơnơ̆ do 2 lơgar dê.

Broă lơh geh uă broă lơh geh kwơ, tàm hơ̆ geh: cùp rùp lời kir, sền ràng tơlik rùp gĭt gơ̆p Việt Nam mờ Lo, lơh đơs crih tam ya, sền lơma jơnau sền gŏ mờ măt tơn bè 75 nam gĭt gơ̆p 2 lơgar dê, tìp măt bơyai mờ kơnòm bơsram, cau bơsram dờng lài do 2 lơgar dê mờ boh bơr bè ală kir sơnrai bơsram sră, lơh broă mờ lơgar ndai bơto bơtê.