Tàm dơ̆ wă, Tổng Ƀí thư đơs sùm dơ̆ lòt còp dơ̆ do nàng kờñ sơlơ tơnguh tai bơta gĭt gơ̆p lơh broă bal tơl làm tàm ală gah broă, is ồn là lơh broă bal lơh sa mờ Indonesia. Việt Nam pơn jờng ală mpồl lơh sa kă bro lơgar Indonesia bơcri priă tàm Việt Nam mờ kơ̆p kờñ lơgar Indonesua lơh geh ală bơta ai ală mpồl lơh sa kă bro Việt Nam in bơcri priă, pờ ơnàng bơnah kă bro tàm lơgar Indonesia. 

Đơs nền gùng dà broă lơh ală rơndăp broă lơh mờ Tập đoàn Ciputra gam lam lơh tàm Việt Nam, Tổng Ƀí thư sồr Tập đoàn pơgồp bal niam mờ Anih duh broă Làng bol ƀòn dờng Hà Nội mờ ală anih lơh broă geh gơrềng nàng lam lơh rơndăp broă lơh; mơkung pơn jờng Tập đoàn pơn jat tai kơlôi sơnơng lam lơh ală rơndăp broă lơh pa tàm Việt Nam, lơh jat niam rlau tai ală gah geh bơta ƀuơn, bơta pràn tàm lơh broă bal bơcri priă, pơgồp bơnah nàng Việt Nam in lơh geh ală jơnau kờñ gơguh lơh sa neh geh ai. Kung tàm mho ngai 9/03, Tổng Ƀí thư ồng Tô Lâm neh tus bal Dơ̆ yal sơnđờm mut ngui gùng rơndeh par song tơn bơh Vietnam Airlines đah ƀòn dờng Hồ Chí Minh mờ Denpasar, tiah tờm Bali dê bơh nhai 6 nam do, gơ gơs gùng rơndeh par dơ̆ 2 bơh Vietnam Airlines tàm tơrbŏ bal Việt Nam mờ Indonesia, tơnguh kờp jơh dơ̆ par bơh Gah rơndeh par đah 2 Dà lơgar dê gơguh tus 14 dơ̆ par pah poh.