Ngai 20/03, tàm Hìu duh broă Đảng Dà lơgar, Tổng Ƀí thư ồng Tô Lâm neh wă Thượng Nghị sỹ lơgar Mỹ ồng Steven David Daines. Tàm dơ̆ wă, Tổng Ƀí thư ồng Tô Lâm jờng rơ Thượng Nghị sỹ lơgar Mỹ ồng Steven David Daines dơ̆ sơnrờp lòt còp Việt Nam mờ đơs là, dơ̆ lòt còp geh gơtha kwơmàng, pơgồp bơnah chồl tơngguh gĭt gơ̆p đah Việt Nam mờ Mỹ bơtàu tơngguh niam bơnĕ. Tổng Ƀí thư đơs nền, Mỹ là dùl tàm ală cau lơh broă bal kwơmàng khà dùl lơgar Việt Nam dê, jờng rơ lơgar Mỹ pơn jăt tai sơlơ lơh broă bal tai mờ Việt Nam, kờñ Việt Nam “pràn, lơngăp lơngai is, kơnờm tàm bơta pràn is, pas sơm”.

Tổng Ƀí thư yal bàr pe pơlam gùng nàng kờñ lơh niam bơta pràn bơh gĭt gơ̆p đah 2 lơgar dê tàm tơngai tus, hơ̆ là: lơh sa, kă bro phan, mờ bơcri priă pal pơn jăt tai là broă lơh kwơmàng bơh gĭt gơ̆p 2 gah dê, pơn jăt tai bơsong jơnau gơlời wơl bơh rài tam lơh dê, rề ơnàng mờ sơlơ lơh broă bal tai tus ală broă lơgar Mỹ geh bơta pràn mờ Việt Nam geh jơnau kờñ, bè: jak chài măy mŏk, tam gơl pa bơceh lơh, năng lượng, phan sơnơm tơm ba, broă lơh sa sươn sre.