Tổng Ƀí thư ồng Tô Lâm pà gĭt, jăt tàm bơta gĭt gơ̆p lơh bơyô bal ờs mờng niam bơnĕ, mờ ală broă lơh geh kơ̆ kơnhăp ngan neh lơh geh, gĭt wă mờ pin dờn bal mờ gơ̆p, tam pà bal uă bơta ndrờm bal bè bơta kwơ mờ ai lài jŏ jòng, kung bè wèt sền bal bè lơngăp lơngai, pas sơm sùm, bơtàu tơngguh kơ̆ kơl jăp tàm tiah do, đơng lam bồ 2 lơgar chờ hờp yal bơr tơngguh gĭt gơ̆p đah Việt Nam mờ Indonesia gơguh tus Tam klăc lơh broă bal Jŏ jòng Tơl làm.

Broă Việt Nam mờ Indonesia lơh gĭt gơ̆p Tam klăc lơh broă bal Jŏ jòng Tơl làm là tềl lời wơl kah yau, pờ tơlik rài pa ai lơh broă bal đah 2 lơgar in tàm jơh ală gah, ală broă, ai gĭt gơ̆p ngai sơlơ gơlòt mŭt tàm uă broă, ngan ngồn, geh cồng nha, tài bơta kwơ Làng bol 2 lơgar dê, pơgồp bơnah tàm ring lơngai, kơ̆ kơl jăp, lơh broă bal mờ bơtàu tơngguh tàm kơnhoàl ù tiah do mờ tàm dunia. Kwang ătbồ lơgar Indonesia ồng Prabowo Subianto kung tơlik nùs nhơm chờ hờp geh wă rò Tổng Ƀí thư ồng Tô Lâm bal mờ Mpồl cau ala măt kâp dờng lơgar Việt Nam lòt còp. Di dơ̆ do, 2 đah neh tơngguh tus gĭt gơ̆p Tam klăc lơh broă bal Jŏ jòng Tơl làm.