Lam bol añ tus còp wơl ală tiah tam lơh 50 nam lài, cau ling yau ồng Đinh Nhiêu kis tàm sàh Ia Yeng, kơnhoàl Phú Thiện kung gam kah sùm dơ̆ kơrian tam lơh tàm gùng 7. Tŭ hơ̆, ồng là cau atbồ mpồl 2, C1, H11 gơwèt Tỉñ đội Gia Lai – Kon Tum.

Ồng Đinh Nhiêu yal: tơnơ̆ mờ tŭ ling he tơnklàs geh Buôn Ma Thuột, rơlao 15 rơbô nă ling sò tơm ngòt rơngơ̆t ngan ntoăt dô bơh Kon Tum mờ Pleiku mù tàm tiah ring tàm gùng 7. Mpồl ling hơ̆ gơtìp tàm bơta tung lơtang tŭ gơtìp ling lơgar he sò tơm, kơrian lơh: “Tŭ hơ̆ ling sò tơm là lơh dùl mpồl dờng mơya ờ geh cau lam bồ, tŭ hơ̆ rơndeh sơtăng, phan ling klàng lòt sùm ur ar mờ ờ geh gùng, ờ geh cau đơng lam, tŭ hơ̆ phào crong, phan ling klàng sơrbì bềng gùng. Tŭ hơ̆ cau ling lơgar he, cau ling gàr ƀòn là ndrờm kơ̆t chèo kò tềng tê kiao, di lah ờ geh chèo kò den ờ di ling he”.

Jăt gah gùng 7, ală tiah bè Dà dờng Bờ, rơbàng Cây Sung, koèl kơh Tô Na… neh gơs bơta ngòt rơngơ̆t bơh mpồl ling gơtìp ờ jai tam lơh dê. Cau ling yau Ksor Chư, tŭ hơ̆ gơwèt Mpồl di mơ 48, Sư đoàn 320, Ling mpồl 3 ngoh rơngăc kah wơl tam lơh pha lin nam lơi: “Tŭ kơno jơnau yal mhar là Ling mpồl 2 nguỵ ntoăt dô tàm gùng 7, bè hơ̆  là mpồl ling he wàng se, cuh tơl nai gar phào. Tŭ hơ̆ tàm mpồl ling bi Tạ Tấn, Đơng lam cíñ trị ling klàng sồr cau ling Chư ai rơndeh lòt dong klàs làng bol, añ lơh jăt bal. Nùs nhơm bơh dơ̆ tam lơh hơ̆ ngoh rơngăc ngan, añ pơnyờ să ngan tài añ neh lơh geh dùl broă niam ngan tàm rài kis añ dê”.

Tŭ ling lơgar he tam lơh pràn, ală ling sò tơn gơtìp gơprah gơprèng jơh tàm gùt brê bơnơm. Uă tiah, cau ling sò tơm căp is tê, tam hoài bal lik hờ gùng 7 yờ bồng bi bò pờ tê ờ jai tam lơh. Tàm jơnau kal wơl bơh Đại tá Nguyễn Vi Hợi, Cau khin cha jăk chài ling klàng làng bol, cau ling yau Mpồl di mơ 64, Sư đoàn 320, Ling mpồl 3, ală ngai nhai 3 nam 1975 mờ ală dơ̆ tam lơh cui rơcai mơya pơnyờ să ngan: “Dơ̆ tam lơh cui rơcai ngan mờ añ tus bal tam lơh là ngai 17 mờ 18 nhai 3, bàr ngai hơ̆ là kơrian Ling mpồl 2 Việt Nam Kộng hoà tàm gùng 7. Tŭ hơ̆ sùm ai nùs nhơm là tơnklàs đah jum Dà lơgar tơrgùm bal. Tŭ hơ̆, tàm tam lơh bol añ ờ kơlôi bơta lơi tus mờ phi să, tŭ lơi phi să den phi să, tŭ lơi sồt să den sồt să, là sùm tam klăc bal nàng tam lơh”.

Tam lơh pha lin gùng 7 neh pơgồp bal kwơ màng tàm tam lơh pha lin Tây Nguyên, pờ geh dơ̆ niam kwơ màng ngan ling klàng bal mờ làng bol he lơh mhar dơ̆ Tam lơh sò tơm mờ ntào tam lơh kàl prang nam 1975, tơngklàs đah jum, Dà lơgar tơrgùm bal. Neh 50 nam, gùng 7 – do là gùng neh geh tŭ sền ală dơ̆ tam lơh jăk chài, tŭ do neh gơs gùng dà lơgar 25, dùl gùng tờm tơrbŏ càr Gia Lai mờ ală càr tiah tàm gùl lơgar dê.

Ồng Rah Lan Chung, Củ tịc Anih duh broă Làng bol càr Gia Lai đơs bè broă bơtàu tơnguh ală tiah tàm gơl gùng do: “Gùng dà lơgar 25 – gùng 7 pa do neh geh lơh gùng, tŭ do gơl gùng do tơrbŏ tus càr Phú Yên broă lòt rê geh sùm. Tŭ do tàm rơndăp ù tiah mờ ai geh gùng dà bơtàu tơnguh bơh ală kơnhoàl tàm càr dê lòt gan gơl gùng do, tàm hơ̆ geh Phú Thiện, Ayun Pa, krông Pa den bơta bơtàu tơnguh bơh ală tiah do dê ndrờm geh bal bơh gùng tờm do dê. Tiah do tŭ do neh gơs ală tiah drà dờng. Rài kis làng bol neh geh bơtàu tơnguh uă ngan pơn drờm mờ ală nam lài do, làng bol chờ hờp ngan, bal mờ Đảng, Dà lơgar nàng lơh jăt ală gùng dà broă lơh bè bơtàu tơnguh lơh sa, tơnguh uă rài kis”.

Tiah thòng Cheo Reo tŭ do neh tam gơl uă ngan. Bơta tơlir bơh tờm chi sa plai bal mờ ală hìu geh lơh dờng niam neh tơn jơh bơta tềl tơngŏ bơh dùl rài tam lơh, gam rơhời tam gơl să gơs tiah pràn lơh sa đah măt tơngai lik càr Gai Lai dê.